ISOKA likaNonku Williams liphumele obala ngokuthi selike ladonsa ejele ngesikhathi lixoxa ohlelweni, iThe Real Housewives of Durban, kuleli sonto.
UDumsani Ndlanzi, obizwa ngeGangstar Boyfriend ezinkundleni zokuxhumana, uveze lezi zindaba phambi komkhwekazi wakhe njengoba bonke bebesemzini kaNonku. Umkhwekazi, obukeke ethuswa yilezi zindaba, uthe akamehluleli kodwa uthuswe ukuthi azikhiphe zonke lezi zindaba abebengazazi. UNdlanzi uthe ijele limfundise nokuthandaza.
Okunye okuvelile ukuthi uNdlanzi uzimisele ngokushada uNonku, athe ufuna ayovusa umuzi wakubo njengoba engasenabo abazali. Yize uNonku engavumanga futhi enganqabanga ukuthi uzoshada naye kodwa ushaye phansi ngonyawo wathi ngeke aye kohlala emakhaya yena.
Kwesinye isiqephu kuvele uMbali Ngiba etshela uSanelisiwe ‘Sanesh’ Bhengu ukuthi zonke izintokazi ezikulolu hlelo azimfuni. Bekulindeleke ukuthi uSanesh uzolwa njengenjwayelo uma etshelwa lezi zindaba kodwa uvele wabonga ukuthi kukhona umuntu omtshela iqiniso ngoba abanye bayamhleba.
Seluphela lolu hlelo kuzwakale umsindo wolwayo okungavelanga ukuthi ubani waze waphahlaza amapuleti phansi. Konke kuzogqama kahle kuleli sonto sekuqhubeka lesi siqephu.