CHARLES KHUZWAYO noSANELE NDLOVU
SEKUNOKUDIDEKA ngokunyamalala komsakazi woKhozi FM, uZimiphi "Zimdollar" Biyela, emdlalweni wethelevishini owuchungechunge okhonjiswa kwi-e.tv, iDurban Gen.
UZimdollar ulingisa indawo kaMatron Nobuhle Nkabinde kulo mdlalo. Ukuphanjaniswa kwezingane esibhedlela saseDurban Gen kwenza abaphathi bathatha isinqumo sokumisa uMatron Nkabinde emsebenzini. Okudida abantu ukuthi kulesi sibhedlela sekunoMatron omusha umntakaMadoda, okuyindawo elingiswa nguPhumzile Mlangeni.
UZimdollar ubuye wazakhela ugazi kubabukeli balo mdlalo ngengoma ayicula nozakwabo ethi Izinqe ZeBoss.
Kuthintwa okhulumela lo mdlalo, uNomfundo Zondi, ucele ukunikezwa ithuba lokuthola kwinkampani ekhiqiza umdlalo, iStained Glass Productions, ngokunyamalala kukaZimdollar kuwona. OyiMarketing Assistant, uThabile Mokone, uthe uMatron Nkabinde uzobuya kodwa wangasho ukuthi nini?
"Indawo yakhe isamile okwamanje," kushaya ngezinqamulelayo uThabile. Ebuzwa uZimdollar naye ukuqinisekisile ukuthi akuphelile ngoMatron Nkabinde kwiDurban Gen.
“Yebo, ngiyabuya, ngisamiswe izinyanga ezimbalwa kodwa ngizobuya ngingalindelekile, okuzosusa umsindo phakathi kwami no-matron omusha,” kuphetha uZimdollar.