Nokubongwa Phenyane
Ukusho lokhu emva kokuthola indawo emdlalweni Isibaya lapho eqale khona ukuqopha ngesonto eledlule.
Ulingisa indawo kaLondiwe Ngubane, oyindodakazi kaJamludi Ngubane (Martin Ziqubu), engumzala wenkosi uDabula Ngubane (Chris Q Radebe) ephuma eMlaza.
Ekhuluma neSolezwe, uLondiwe uthe ujabule kakhulu futhi ababukeli bomdlalo bazoyithokozela indawo yakhe.
“Inhliziyo yami yaphuka kakhulu ngesikhathi ngithola ukuthi kuyaphela ngomdlalo Isithembiso, kwakubuhlungu ngoba ukuthola umsebenzi endimeni esikuyo kuyinto engelula ngempela. Kuthe sekunjalo yahlasela iCovid-19, ngavele ngabona ukuthi kuphelile ngami. Kodwa uJehova emkhulu buka manje ngikuphi. Ukuba emdlalweni omkhulu kangaka kungithokozise kakhulu,” kusho uLondeka.
Uthe uLondiwe uyintokazi ezitshela ukuthi yazi kakhulu njengoba ifikele emakhaya.
“Abantu bazobona intokazi ehluke kakhulu kunoSne akade bembona emdlalweni engiqale ukulingisa kuwo kwithelevishini. Nami bengingathandi ukuthi izindawo zifane ncamashi njengoba manje sengikomunye umdlalo ohlukile,” kusho uLondeka.
Le ntokazi ezalelwe eMachunwini, eMsinga, kodwa yakhulela eClermont, eThekwini, izoqala ukubonakala kulo mdlalo namhlanje, kuMzansi Magic (161).
UKarabo Maroga weMzansi Magic, uthe bamamukela ngezandla ezimhlophe futhi bayathemba ukuthi ababukeli bawo bazoqhubeka nokuwuthokozela njengoba kukuningi okuseza kuwo.