ZIKHONJWA kwisiteshi sethelevishini izilomo ezimbili, okubalwa umsakazi nomlingisi weminye yemidlalo kwi-1 Magic.
ULawrence Maleka wodumo lweThe River, uzovumbuka kuSABC 1 nohlelo olusha okulindeleke ukuthi lushise izikhotha. Lolu hlelo olubizwa ngokuthi Too Hot To Be Single kulindeleke ukuthi luqale ngo-Ephreli 8. Ngokusho kweSABC wuhlelo lwabantu abafuna uthando ngendlela yesimanje futhi ebingajwayelekile kwindlu emnyama.
Kujwayelekile ukuthi insizwa izibike kwintokazi eyibuke yayithanda uma ihlangana nayo kodwa lolu hlelo luzokwenza okuhlukile ngoba abanye bazoxhunyaniswa ngisho ezinkundleni zokuxhumana. Umuntu uzonikwezwa nethuba lokuzikhethela kubantu abahlukene, ahlunge aze afike kulo azizwa sengathi unazo zonke lezi zinto azifunayo ebudlelwaneni bezothando.
Omunye ozokhonjwa kwiSABC, obengumsakazi weGagasi FM uZola Zeelovin. Le ntokazi ibingomunye wabasakazi abebengaconsi phansi kubalaleli bomsakazo. Yize kwakuba muncu kubalandeli bakhe ngesikhathi ekhipha isitatimende ezinkundleni zokuxhumana kodwa sebezokwazi ukumbona ohlelweni olusha lwezokuvakasha kuSABC 1.
Lolu hlelo olubizwa ngokuthi Shayi'Round, kulindeleke ukuthi luqale ngo-Ephreli 7. Luzogxila kwezokuvakasha lubheka abangani, abasebenzi nezelamani.
Owengamele ezokuxhumana kuSABC 1, uDzivhuluwani Siala ukuqinisekisile ukuthi iSABC inalezi zinhlelo wathi kuningi ababukeli abazokufunda ngobuhle bezokuvakasha nabazokuthakasela ngezobudlelwane bezothando.