OLINGISA indawo kaRebecca Mabuza kwiSitha:The Enemy, uLinda Sebezo, uthi uyayeshwama eyokuthi uzithwele.
Uphendule kanje uLinda (60) ngesikhathi ebuzwa ngamahlebezi asesabalele ezinkundleni zokuxhumana. Kuthiwa inkakha yomlingisi ikhulelwe yize seyineminyaka ewu-60.
ULinda uthe nakuba lawa kungamampunge akhiwa ngabantu kodwa yena ayamchaza.
"Akukho okunye engingakuphendula okudlula lokhu. Engingakusho nje ukuthi abantu ababukele Isitha phakathi nezinsuku ngo-9 ebusuku," kusho uLinda onendodakazi enguzinyo-bulala, uThandi.
Amahlebezi asabalale emuva kokubonakala kukaLinda emicimbini iHollywoodbets Durban July ngempelasonto edlule eGreyville Racecourse, eThekwini.
Umlingisi waqala ukuyibamba insimbi ishisa kulo mkhakha kusukela ngeminyaka yo-1980, ngaphansi kwengwazi yemidlalo yeshashalazi, uGibson Kente.
Yize eseneminyaka emingaka kulo mkhakha kodwa akakuyelanga esikoleni ukulingisa kodwa ukhamba lufuze imbiza kuye. Uyise uRonnie, wayegumculi ekubeni ubabekazi wakhe uNomazizi Molose, wayelingisa emdlalweni wethelevishini, iMama's Love.
Kusukela lapho uqhubekile nokuvelela emidlalweni yeshashalazi nakweyethelevishini okubalwa iGreed and Desire, Lockdown, Isibaya neminye.