KUZOBONAKALA nabaculi bangaphandle kwaseNingizimu Afrika emcimbini wesithupha i-ACTPRATO Experience Younder Music, ezoba sePlayhouse Opera Theatre, ngoMgqibelo.
Kulo mcimbi okuzohamba phambili kuwona uNtokozo Ngongoma, kuzonandisa abanye okukhona kubo uPastor Takesure Zamar Ncube waseZimbabwe noPutuma Tiso.
UNtokozo ekhuluma ngomcimbi uthe usekubheke ngabomvu ukujabulisa abantu kuwona.
“Kuyimanje sisebenza kanzima ukuze sijabulise abantu. Sithembisa abantu ubusuku abangeke baze babulibale. Ngizobe ngicula izingoma zami ezintsha nezindala ezikwi-albhamu yami esazophuma, nengizoyikhipha maduzane. Abantu abafike sizodumisa bese sibonga uMdali ngakho konke esidlula kukona,” kusho uNtokozo.
Uthe amathikithi omcimbi asekhona njengoba etholakala eWebticket nasePick n Pay ngoR250 nangoR350.
UZodwa Msimang kaNsibande ongusihlalo wenkampani Ikhono Foundation, eyingxenye yomcimbi uthe bajabule ngokuhlanganyela nabahleli bomcimbi womculo.
Uthe ingxenye yemali ezotholakala emcimbini izosiza kakhulu enhlanganweni yayo engenzi nzuzo.
Uthe ziningi izinhlelo abanazo emphakathini ezizohlomula kulokhu.