NCINCI kamjoli emacikweni njengoba eqashwe kakhulu kulungiselwa ukwethulwa kwezethembiso zokhetho ze-ANC okuzoba seMoses Mabhida.
Esithangamini sabezindaba se-ANC ebesiseMoses Mabhida, kuvelile ukuthi maningi amaciko aqashiwe azonandisa emcimbini.
Isimemezelo senziwe yiPhini likaNobhala we-ANC, uNomvula Mokonyane othe kuzobe kumnandi kakhulu kusasa eMoses Mabhida kwezokungcebeleka. Yize engawadalulanga amaciko abawaqashile kodwa kuvele ukuthi maningi azobe ekhona.
Omunye umcimbi okucacile ukuthi wenziwe wahlobana nowezethembiso zokhetho ze-ANC, iPre Party ye-ANC Youth League obizwa ngeBlack Oceans Mall Manifesto Weekend ozoba se-Oceans Mall namhlanje.
Kuwona bafolosa ngoDJ Tira ozobe enandisa khona. Baze bakhipha nezipesheli zawo zokubukhwa kwamatafula njengoba kukhona abiza u-R2000, R3000, 5000 no-R7500.
UDJ Muntu Da Don, uthe ungomunye wamaciko azobe enandisa ezindaweni ezahlukene emicimbini ehlobene nemanifesto ye-ANC. Uthe uzobe ekhona e-Exit, okungenye yezindawo ezishisayo muva nje eMlaza. Uthe naseSkyzer naseWise Corner uzobe ekhona.
Nakuma-mini rallies e-ANC abesezindaweni ezahlukene asetshenzisiwe kakhulu amaciko. Amaciko abonakalile enandisa ezindaweni ezahlukene, okukhona kuzona uMsinga, Nanda, KwaXimba nakwezinye.
Umphathi weMax’s Lifestyle Village, uZinhle Mqadi uthe nabo noma bengakabi nalo uhlelo oluqondile lokusingatha izicukuthwane ze-ANC kodwa umuzwa wemanifesto usukhona njengoba izolo bekukhona amalungu-ANC abedayisa imifaniswano yenhlangano kule ndawo.