UZIBEKE ethubeni lokubuya nendondo yesibili kuma-Olympic aseParis, umbhukudi wakuleli uTatjana Smith, engena kowandulela owamanqamu emjahweni ka-200m wabesifazane we-breaststroke ngoLwesithathu ekuseni.
USmith osevele unqobele elakuleli igolide ku-100m, uphume phambili emzuliswaneni wokuhlunga koka-200m ngesikhathi esingu-2:21.57.
Endaweni yesibili kungene omunye umbhukudi wakuleli, uKaylene Corbett, oshaye isikhathi esingu-2:23.85.
Bobabili bazobhukuda kweyandulela owamanqamu khona ngoLwesithathu ebusuku. Bazobe belwela ukushaya izikhathi ezisheshayo ezizobafaka kwabayisishiyagalombili abazobhukuda kowamanqamu ngoLwesine ebusuku.
Khonamanjalo, uPieter Coetze, uzibekisele indawo kowandulela owamanqamu ka-200m wabesilisa we-backstroke. UCoetze ubashiye bonke emzuliswaneni wokuqala waqeda ngo-1:56.92. Umjaho wakhe olandelayo nawo uzoba ngoLwesithathu ebusuku.
Kwi-triathlone yabesifazane, uVicky van der Merwe ungene endaweni ka-46 ngo-2:05.16, kweyabesilisa uHenri Schoeman wangena endaweni ka-20 ngo-1:45.53, kwathi uJames Riddle wangena kweka-25 ngo-1:47.15.
Kweminye imidlalo, liphinde lakhala ngaphansi iqembu lakuleli labesifazane le-hockey, linqotshwa yiGreat Britain ngo 2-1.
Lisasemsileni kuPool B ngeqanda ngoba selinqotshwe imidlalo emithathu ilandelana kuleli qoqo. NgoLwesine lizodlala neSpain ngo-5.30 ntambama bese lidlala ngoMgqibelo owokugcina wamaqoqo ne-USA.
Kwi-rowing uPaige Badenhorst unqobe umjaho owanduela owamanqamu kwiWomen's Single Sculls ngo-7:55.81. Nokho, njengoba eseqhudelana esigabeni sesithathu akasekho ethubeni lokubuya nendondo kowamanqamu, uselwela ukuqeda endaweni engcono.
Kwenzeke okufanayo nakuJohn Smith, benoChristopher Baxter abangene endaweni yesine kwiMen's Pair Semi-Finals, asebezongena kowamanqamu esigabeni sesine. Nabo abasekho ethubeni lokuthola indondo.
Imidlalo isazoqhubeka kusihlwa lapho abakuleli bezobonakala khona kule midlalo elandelayo:
7.16pm - Men’s Archery
Wian Roux
7.45pm - Men’s Hockey
South Africa v Spain
9.55pm - Men’s Backstroke SF
Pieter Coetze SF
10.03pm Women’s Backstroke SF
Kaylene Corbett
10.11pm Women’s Backstroke SF
Tatjana Smith