KUHLOSWE ukuthi liphinde likhuphuke izinga emiqhudelwaneni yezikole kazwelonke, iKay Motsepe Schools Championships, kulandela ukwandiswa kwemali ezoxhaswa ngayo nonyaka.
Izinhlangano ezibambisene ekuxhaseni lo mqhudelwano, iMotsepe Foundation neSanlam, zimemezele izolo ntambama ukuthi kulo nyaka zizofaka isamba esingu-R28 million emiqhudelwaneni yezikole yezemidlalo, bese zifaka u-R8 million emqhudelwaneni wezikole womculo wamakhwaya.
Kwezemidlalo kunomqhudelwano webhola wabafana, owasungulwa ngo-2004, owebhola wamantombazane nowe-netball.
Isikhulu esiphezulu seSanlam Retail Mass, uBongani Madikiza, sithe kusho lukhulu kubona ukuba yingxenye yale mincintiswano ngokubambisana noMnyango wezeMfundo nowezeMidlalo, ubuCiko namaSiko.
"Ngaphandle kokubala abadlali nabaculi abadlule kule miqhudelwano asebezakhele amagama emazingeni aphezulu njengoPercy Tau, Hlompho Kekana, Ronwen Williams, nabanye, okusemqoka yindlela esithinta ngayo imiphakathi," kusho uMadikiza.
"Izikole ezinqobe imiqhudelwano yakamuva zikwazile ukusebenzisa imali eziyitholile ukulungisa lapho kudingeka khona njengezindlu zokufundela, ukuthenga ama-computer, ukulungisa izinkundla zebhola nokunye. Abanye bakhele umphakathi indawo yokukha amanzi.
"Lokhu kuchaza ukuthi esikwenzayo akupheleli enkundleni kuphela kodwa kwenza umehluko emphakathini."
Nyakenye, umqhudelwano webhola wabafana ka-Under-19 wanqotshwa yisikole saseLimpopo, iBenny Sports Academy, oka-Under-14 wathathwa yiClapham High yaseGauteng.
Ebholeni lamantombazane ku-Under-14 isikole esadla umhlanganiso kwaba esaKwaZulu-Natal, iTholokuhle High.
Kwi-netball kwanqoba iStellenberg High yaseKapa neBoitumelo G Secondary yaseTembisa. Womabili la maqembu amela elakuleli emqhudelwaneni waphesheya owawubanjelwe eSingapore ngoNovemba nyakenye, wanqotshwa yiStellenberg.
Umqhudelwano wamakhwaya uzobanjelwa eGauteng kusukela ngo-Agasti 7. Amaqembu azomela izifundazwe kwi-netball azotholana phezulu eNorth West kusukela ngo-Agasti 15. Umqhudelwano webhola uzoqala ngo-Okthoba ngezinsuku ezisazomenyezelwa.