UZISHAYA isifuba ngomgoga awucuphele i-Orlando Pirates, umqeqeshi weKaizer Chiefs, u-Arthur “10111” Zwane, obuyise ukuzethemba kubalandeli baMakhosi kwiDStv Premiership ngoMgqibelo e-FNB Stadium, eSoweto.
UZwane obekuwumdlalo wakhe wokuqala womkhaya baseSoweto njengenhloko yabaqeqeshi, unike abalandeli beChiefs igunya lokuqholosha kwazise itulo lakhe lisize leli qembu laseNaturena lanombela laba ngaphezulu kwePirates kwi-log.
Amakhosi abenganikwe lutho ngaphambi kwalo mdlalo ngenxa yefomu yawo yakamuva, abuyele emakhaya ebhiyoza kulandela ukunqoba kwawo ngo 1-0 kwizimbangi zawo ezinkulu, iPirates.
Kube igoli elishiye abaningi beshaqekile elishaywe uYusuf Maart, ngomzuzu ka-74 elithobise iPirates efike kowomkhaya ihambela phezulu kulandela umphumela wayo wakamuva ewuthole ikhipha iMamelodi Sundowns kwiMTN8. UMaart udonse intambo ende engasesiyingini senkundla, weqisela unozinti weZimnyama, uSiyabonga Mpontshane, obephume waphela emapalini akhe.
“Okumqoka kunakho konke ukubonga abadlali ngokuqinisekisa ukuthi bahlale bekuqaphe njalo lokhu ebesikucuphele iPirates,” kusho uZwane esithangamini nabezindaba ngemuva komdlalo.
“Siyihlelele ngokukhulu ukucophelela iPirates safika kulo mdlalo sikuqonda kahle okuyikhona ebulala ngakho amaqembu amaningi.
“Sisebenzise leyo ndlela yabo yokudlala ukuzakhela awethu amathuba ngokucupha umgoga wokuthi uma ibhola lonakala kubona, kube ilapho esizoqala khona ukuhlasela ngejubane njengoba kwenzeke amahlandla amaningi.
“Ngizishaya isifuba ngabadlali bami abahlale bazinza kulokhu ebesikuhlelile kwathi noma sekuvele namathuba ebesivele sazi ukuthi azovela, afika siphapheme futhi siwalindele,” kusho uZwane.
Lo mqeqeshi uveze nokuthi ukulimala kukakaputeni wePirates, u-Innocent Maela, kubasizile ngoba lo ongene endaweni yakhe ubekwenza kube lula kakhulu obekuzanywa iChiefs.
“UMako (Paseka) ongenele uMaela uyazifela ngokudlala eya phambili lokhu bekuvula ithuba lokusebenzisa ijubane (lika-Ashley du Preez) kuleyo ndawo.
“Kaningi sicishe sithola amanye amagoli kodwa-ke njengoba sonke sazi ukuthi kusafanele siqhubeke nokusebenza ekuqedelelweni kwamathuba, amaningi awo asizange siwasebenzise.
“Ngijabule kakhulu ngale wini ngoba ibidingeka, kimina, kubadlali nakwiChiefs isiyonke okuhlanganisa nabalandeli esingangabazi ukuthi bafanelwe okungcono kunalokhu esibanika kona njengoba sisabumba,” kusho uZwane.
Lobn bekuwumdlalo wokugcina weligi njengoba kuyiwa ekhefini leNdebe yoMhlaba eseQatar ngoNovemba. IChiefs isiyoze ibuyele ensimini koweligi ngoDisemba 31 ivakashele iLamontville Golden Arrows ePrincess Magogo Stadium, KwaMashu. Nokho ngoNovemba 12 Amakhosi azodlala kwiCarling Black Label Cup, okuwumqhudelwano wamaqembu amane okukhona nePirates, AmaZulu neMamelodi Sundowns.