UZOBHEKISA amabombo emcimbini wemiklomelo yeBallon d’Or, eFrance, ehlekela nxanye unozinti weMamelodi Sundowns neBafana Bafana, uRonwen Willliams, ngemva ukuqokwa kwakhe kwakamuva eminxeni emithathu yamaCaf Awards.
UWilliams (32) uqokelwe umklomelo i-Caf Interclub Men's Player of the Year, iMen's Goalkeeper of the Year noweCaf Player of the Year. Le miklomelo okungemikhulu ebholeni lase-Afrika, uzoyibanga nabadlali okubalwa kubona u-Ademola Lookman we-Atalante, Achraf Hakimi we-Paris Saint-Germain (PSG) nonozinti weChippa United, uStanley Nwabali.
Kuyo le miklomelo yeCaf, iqembu likaWilliams, iMamelodi Sundowns iqokwe emunxeni i-Men’s Club of the Year, kwathi iqembu lesizwe, iBafana, laqokwa kwi-Men’s National Team of the Year. Umqeqeshi weBafana, uHugo Broos, uqokelwe koweMen’s Coach of the Year.
UWillliams uzobe enezihlabani zebhola ezivelele emhlabeni emcimbini wemiklomelo yeBallon d’Or yodumo ngoMsombuluko, lapho okuzomenyezelwa umdlali obaqwaqwade emakhanda eTheatre du Chatelet, eParis, eFrance,
Kowe-Ballon d’Or, uWilliams uzobanga umklomelo weYashin Trophy nonozinti abasezingeni eliphezulu emhlabeni okubalwa u-Andriy Lunin weReal Madrid, Diogo Costa we-FC Porto, noGianluigi Donnarumma wePSG.
Kusukela kwethulwa i-Yashin Trophy ngo-2019 akekho unozinti wase-Afrika, oseke wahlabana ngalo mklomelo.
Unozinti waseSenegal, u-Edouard Mendy, osedlala kwi-Al-Ahli yaseSaudi Arabia, walala isibili kuDonnarumma ngo-2021.
Ukushaya into ecokeme kukaWilliams kwiBafana ngoFebhuwari nonyaka kwi-Africa Cup of Nations (Afcon) eyayidlalelwa e-Ivory Coast, yikho kanye okwathatha amehlo ezingqapheli nabaqoki kwiCaf nakwiFifa, okumenze wazithola eqokelwa kule miklomelo emqoka emhlabeni.
Kwi-Afcon lo nozinti odabuka eGqeberha, e-Eastern Cape, wenza ezibukwayo evimba amabhola anzima okubalwa namaphenathi, esiza iBafana ibuya nendondo yethusi kulo mqhudelwano, wagcina ekhale wemuka ne-Afcon’s Goalkeeper of the Tournament.