Marumo Gallants (1) 1
Mamelodi Sundowns (2) 3
KUHLULEKE nabalandeli beBloemfontein Celtic abebepikwe yiMarumo Gallants, ukuyilamulela ngesikhathi ikhishwa iMamelodi Sundowns kwi-Last 16 yeNedbank Cup, egijinywe ngoLwesine ebusuku, eToyota Stadium, eBloemfontein.
IGallants isanda kuqinisekisa ukuthi izoyisa eminye yemidlalo yayo eFree State kule sizini, ngenhloso yokuxhumana kangcono nabalandeli bayo kuleya ngxeye yezwe (abathi bakhula ngesivinini).
Kusukela iCeltic idayiselwe iRoyal AM kumasizini amabili adlule, abalandeli baleli qembu elingelinye lamadala eNingizimu Afrika, indlala yebhola ilokhu ibabulale njalo.
Bazame bahluleka nokho ukusiza iGallants ethwale kanzima kwiSundowns umdlalo uqala ngakho kodwa.
Akuzange kuphele imizuzu etheni uqalile umdlalo, umgadli we’Downs, uPeter Shalulile, wavula inkundla ngegoli ngomzuzu wesishiyagalombili.
Kusukela kungene leli goli, iSundowns iwuphathe njalo umdlalo kwaze kwaba umzuzu ka-28, lapho lo mgadli waseNamibia eshaye khona elesibili.
Ibuyele kwamhlaba nokho iSundowns ngomzuzu ka-33, uBoitumelo Pheko, okhuliswe yizinkulisa zayo, ejikijela inguzunga yegoli elimshiye enkemile, uDenis Onyango, obevimbele iSundowns.
Nakuba leli goli liphinde labavusa abalandeli abebesenkundleni, obekubonakala iningi labo lihamba neGallants futhi abanye bedlubhe nemibala yePhunya Sele Sele, abebephume ngobningi babo, iSundowns iqhubekile nokuphatha umdlalo kwaze kwayiwa ekhefini.
IGallants kube iyona ebuya ekhefini nezimpawu zokulambela igoli lokulinganisa kodwa iSundowns ibuye yawubuyisela esandleni sayo umdlalo.
Ngokubona ukuthi iGallants iya ngokukhula ngokomdlalo, iSundowns ikhiphe uThemba Zwane noCassius Mailula, izindawo zabo zathathwa uRivaldo Coetzee noHashim Domingo.
Nangempela iSundowns iphinde yazibeka ebuhleni ngomzuzu ka-73 ngegoli likaShalulile lesithathu losuku kade kuyi-free kick. Amagoli amathathu kaShalulile ambeke phambili njengomdlali onamaningi kwiNedbank Cup njengoba eseshaye awu-12.
Kulo mdlalo kubuye nomdlali wasemuva wamaBrazilians, uTerrence Mashego, obelimele, kubonakale okokuqala uThando Buthelezi, edlalela iqembu elikhulu leSundowns.
Emuva kwegoli lesithathu, bese kucaca ukuthi iyaqhubeka indlela yeSundowns ebheke ekuvikeleni isicoco sayo seNedbank esidle kuyona belu iGallants ngesizini edlule.