UMQEQESHI weMamelodi Sundowns, uRhulani Mokwena, uthi konke kusahamba kahle kuyena njengomqeqeshi waleli qembu elingabambeki selokhu ethathe izintambo ezinyangeni ezedlule.
UMokwena ubekhuluma kanjena ephendula ngamahlebezi abevela emithonjeni yabezindaba enhla ne-Afrika lapho kubikwe ukuthi i-Al Ahly neWydad Casablanca amubeke iso.
Ngaphansi kukaMokwena, iSundowns isinqobe imidlalo engu-17 kwengu-19 eqhoqhobele izintambo. Ayikahlulwa.
NgoLwesibili, iqhubekile nokuthela isibhaxu ishaya iRoyal AM ngo-5-1 emdlalweni weDStv Premiership, eLoftus Versfefld. Lo mphumela ubulandela owangoMgqibelo, lapho ibhudluze i-Al Ahly yase-Egypt ngo-5-2 emdlalweni wamaqoqo weCaf Champions League.
“Ngilapha futhi ngifuna ukuba lapha inqobo uma iqembu lisangifuna,” ucashunwe esho kanje uMokwena kwi-website iSoccer Laduma.
“Ngithembikile futhi ngiyazama ukuba nobuqiniso ngaso sonke isikhathi. Ngiyazama ukusebenzela iqembu njengoba likhombisa ukuthi liyakuthanda lokho futhi liyakukhombisa ukuthi ngisafuneka lapha futhi iMamelodi Sundowns isakwenza lokho kusukela ngithathile (isikhundla). Bangesekile futhi banginikeza yonke into. Anginaso isizathu sokulifulathela leli qembu.”