UBENGAKUNCAMELA ukugwema ukutonyulwa ne-University of Pretoria, umqeqeshi weMamelodi Sundowns, uRhulani Mokwena.
UMokwena ukuveze lokhu ngemuva kokuqhathwa namaTuks kuma-quarterfinal eNedbank Cup emcimbini obuseGoli, ngoLwesibili ebusuku.
Lo mqeqeshi wompetha beDStv Premiership, uthe ubefisa ukukubalekela ngoba lezi zimbangi zabo ezidlala kwiMotsepe Foundation Championship, zigqishe ngeningi labadlali elikhulele ezinkulisa zamaBrazilians.
Ukholwa wukuthi ukubhekana neqembu abalikhulisile kuzokwenza bafune ukukhombisa ukuthi benza iphutha ngokubadedela.
ISundowns ikhiphe iMaritzburg United edlala kwiMotsepe Foundation Championship kwi-last 16.
Omunye wokaputeni nesethenjwa samaTuks, uSamuel Julies, uke wabonakala esigabeni esikhulu edlalela iSundowns futhi ikhono lakhe kufanele limsabise uMokwena.
UThabang Sibanyoni, ongumgadli ohamba phambili ngokuhlohlwa kwamagoli kumaTuks kule sizini usemabhukwini eSundowns kodwa imbolekise kuleli qembu.
Ngesizini edlule uSibanyoni ubegadla kwiSuperSport United no-Etiose Igodarro, ongomunye umdlali weSundowns oqale ukugqama imbolekise kumaTuks.
“Mhlawumbe bekuzobangcono ukuba siyigwemile iTuks ngoba umdlalo ubungeke ubenzima ngale ndlela osuzoba lukhuni ngayo,” kusho uMokwena kwabezindaba.
“INedbank yakhelwe ukuthi amaqembu athathwa njengamancane aphuphe ngokuwisa lawa asezigabeni ezinkulu ngakho-ke lo mdlalo ngeke ubelula.
“Okuzowenza ube lukhuni ukuthi iTuks inabadlali abaningi esikimini abakhulele kwiSundowns ngakho-ke angingabazi ukuthi labo badlali bazoba nentshisekelo yokukhombisa ukuthi iSundowns yenze iphutha ngokubadedela.
“Silindele umdlalo onzima kodwa konke kuzoncika ekutheni thina sikwenza ngendlela yini okubhekwe kithina.
“Kuhle ngoba iMaritzburg isanda kusikhombisa ubunzima bamaqembu asezigabeni ezingaphansi kwesikhulu ngakho-ke abadlali abanawo uphawini wokuzithambisa ngoba bebuka isigaba okudlala kusona amaTuks,” kusho uMokwena.
ISundowns kudingeke ukuthi ilwe kanzima ukuthola amagoli kwiMaritzburg, angene umdlalo usuya ngasekupheleni koweLast 16.
IPremier Soccer League isazozimemezela izinsuku nezinkundla okuzodlalwa kuzo ama-quarterfinal.
Aqhathwe kanje esewonke kuma-quarterfinal
Stellenbosch FC v SuperSport United
TS Galaxy v Chippa United
AmaTuks v Mamelodi Sundowns
AmaZulu FC v Orlando Pirates