OWAYENGUMQEQESHI wonozinti kwiJomo Cosmos, u-Avril "Tshawe" Phali, ayimethusi impumelelo kaMelusi Buthelezi odlule ezandleni zakhe kweZenkosi.
UButhelezi (25) waseNquthu, usanda kumenyezelwa njengomunye wabadlali abasha be-Orlando Pirates.
Uthengwe kwiTS Galaxy Tim Sukazi. Uzobanga ijezi nabanye onozinti abaqavile okukhona kubo uSipho Chaine olenze elakhe ijezi efika ngesizini edlule, Siyabonga Mpontshane okungacaci ngekusasa lakhe noRichardo Ofori obehlushwa wukulimala.
Ngaphambi kokujoyina iGalaxy, uButhelezi ubevimbela iCosmos kwiMotsepe Foundation Championship okuyilapho aqeqeshwe khona nguPhali owayengunozinti wokuqina kweZenkosi nePirates.
"Ngumfana wami lowo. Wafika ejimini yeCosmos singamazi futhi engekho omhlelele ukuthi azoziqeqesha neqembu,“ kusho uPhali.
“UJomo (Sono) wangibuza ngaye, ngamtshela ukuthi angimazi ngathi kodwa ‘bheka amahlombe akhe nobude, unozinti wangempela lo. Uzofunda’.
“Bambalwa onozinti abafana naye. Kuningi okwadingeka sikulungise kuye. Kodwa ukuzithoba kwakhe nendlela ahlonipha ngayo yikho okwenza kube lula ukumakha.”
“Ngibonile ukuthi usesayine kwiPirates. Akungimangazi lokho ngendlela asebenza ngayo. Ngiyathemba ukuthi uzosithola isikimu.
“Ngiyazi ukuthi uzosithola kanye angaphinde aphume. Uzokwenza njengoChaine. Kuzoba nzima ukumkhipha. Angimangali futhi ukuthi ukwiBafana Bafana. Ungumfana olungile. Uma engaqhubeka kanjalo uzoya kude.”
UButhelezi ujoyina iPirates nje, usabheke ukuzibekisela indawo esikwatini seBafana esiyodlala emqhudelwaneni i-Africa Cup of Nations e-Ivory Coast ngoJanuwari. Indawo kanozinti wesithathu uyibanga noRicardo Goss weMamelodi Sundowns obukeka eseyithathile inhliziyo yomqeqeshi uHugo Broos.
Onozinti okubukeka bengeke besashintsha nguRonwen Williams ongukaputeni noVeli Mothwa waMaZulu.
Okudingwa nguButhelezi wukuthola isikimu kweZimnyama ukuze azibeke ethubeni lokuya kwi-Afcon. Ngesikhathi esengumdlali uPhali, izinto azimhambelanga kahle kweZimnyama azijoyina esuka kwiCosmos njengonozinti ngesizini ka-2006/2007, washesha wabuyela kweZenkosi ngeka-2007/2008.
“KwiPirates akufani nakwiCosmos nakwiGalaxy. Ingcindezi inkulu. Kudingeka aqine ukuze akwazi ukumelana nobunzima,”kusho uPhali.
“Abalandeli baningi kwiPirates futhi uzokwaziwa ngabantu abaningi manje. Kufanele aqine, agweme amaphutha ngoba thina singonozinti elethu iphutha ligcina enethini.
“Nginesiqiniseko sokuthi uzolithola ijezi kwiPirates. Ngikhuluma naye sonke isikhathi, sihlaziye imidlalo yakhe, ngimkhombise amaphutha nokuhle akwenzile. Ngumfana wami lona.”
Umbango kaChaine noButhelezi kulindeleke uyelaphe inkinga eselokhu yasibekela iPirates kudlula emhlabeni uSenzo Meyiwa ngo-2014.