KUCHWAZE iTwitter eNingizimu Afrika kuvela izithombe zikaSiyabonga Ngezana emdlalweni wokuqala kwiFCSB yaseRomania egqize ibhande likakaputeni kulo mdlalo, enze kuwo iphutha elifana nalawa amenze washiya kwiKaizer Chiefs esenyamanambana.
IFCSB ibidlala nePaok yaseGreece kowamalungiselelo okuqala kwesizini eNetherlands.
UNgezana ungena ngomzuzu ka-60 esuka ebhentshini kulo mdlalo. Ekungeneni kwakhe, kube nesiwombe lapho eshibilike khona nokuholele ekutheni iPaok ishaye igoli.
Kuthe nokho uma sekuphuma ukaputeni weqembu, u-Adrian Sut, uNgezana wanikwa ibhande.
Njengalokhu bekwenza uZwane isizini yonke edlule, nomqeqeshi omusha kaNgezana, u-Elias Charalambous eqala nje ukuphawula ngalesi sitobha, ubesesiphungela.
“UNgezana ngumdlali omusha, bekungumdlalo wakhe wokuqala,” kusho uCharalambous emithonjeni yaphesheya yezindaba zebhola.
“Akusho lutho. Kwenzeka kubo bonke abadlali (iphutha). Kuyingxenye yomdlalo, uyafunda. Ujabule kithi futhi nathi sijabule ngaye,” kusho umqeqeshi.