XOLILE MPISANE
UKUNQOBA kweBafana Bafana kwiLesotho ngo 2-0 emdlalweni wokuhlungela iNdebe yoMhlaba ka-2026, ePeter Mokaba Stadium, ePolokwane, ngoLwesihlanu, kungaphenduka umsebenzi wenkawu uma leli ligcina libekwa icala lokudlalisa umdlali kungafanele.
Lokhu kulandela ukuvela kwemibiko ethi umdlali wasesiswini weBafana Bafana, uTeboho Mokoena, bekungafanele angene enkundleni ngesikhathi ibhekene neLikuena ngenxa yokuthola amakhadi amabili kweyokuhlungela iNdebe yoMhlaba.
UMokoena wathola ikhadi lakhe lokuqala ngesikhathi bedudulana neBenin ngoNovemba ka-2023, elinye walithola bedlala neZimbabwe ngoJuni, nyakenye.
Uma iqembu likaHugo Broos litholakala linecala, kungenzeka liphucwe amaphuzu amathathu, anikezwe iLesotho, nokungashintsha izinto kuGroup C okudlalwe imidlalo yayizolo liqhwakele kuyona.
ILesotho ayifakanga sikhalazo ngosuku lo mdlalo, kwaze kwadlula amahora angu-24 anqunyiwe ngokwemithetho yeFifa.
Yize kunjalo, izikhulu zenhlangano eyengamele ibhola eLesotho, zisanethemba lesinqumo esizovuna zona.
"Umbuzo uthi, ngabe umthetho uphuliwe yini? Uma kunjalo, sinelungelo eligcwele lokumangala futhi sithole amaphuzu. Sazisiwe ngamakhadi kaMokoena futhi sesiyithumele incwadi kwiCaf nakwiFifa,” ucashunwe kanje kwiSowetanLive uNobhala Jikelele weLesotho FA, uMokhosi Mohapi.
Uma iBafana igcina iphucwe amaphuzu kuzobe kungaqali ukuthi izicekele phansi ngokungayifundisisi imithetho yomqhudelwano.
Ngo-Okthoba ka-2011, yabhiyozela amahhala eMbombela Stadium ngesikhathi ibambana ngo 0-0 neSierra Leone, icabanga ukuthi isizibekisele indawo kwi-Africa Cup of Nations ka-2012, kanti akunjalo. Lapha iBafana yayizitshela ukuthi idinga iphuzu kanti kwakudingeka iwunqobe.