ESIKHUNDLENI sokubhiyozela ukuwina indebe iCarling Black Label Cup, umqeqeshi weMamelodi Sundowns, uRulani Mokwena, usale edumele ngesenzo somgadli we-Orlando Pirates abonakale eqophisana naye ngamazwi.
ISundowns iwine iCarling Cup ithela iPirates ngehlazo lika-4-0 kowamanqamu eFNB Stadium, ngoMgqibelo ntambama. AmaBrazilians abeqala ukudlala kulo mqhudelwano ojwayele ukudlalwa yiPirates neKaizer Chiefs. Ngesikhathi umdlalo wamanqamu uqhubeka, kubonakale umgadli wePirates, uKermit Erasmus obekade esebhentshini, ephosana ngamazwi noMokwena.
Lokhu kwenzeke ngemuva kokuthi unompempe ekhiphe ngekhadi elibomvu uThapelo Xoki ngenxa yokudlalisa kabi uHashim Domingo ngomzuzu ka-21 umdlalo uqalile.
UMokwena, ngaphandle kokudalula okuningi, uthe isenzo sika-Erasmus simshiye edumele. Lo mgadli uhlukane neSundowns emasontweni adlule sekumuncu. Kuvele ukuthi uphikisane neSundowns ifuna ukumbolekisa, yagcina isimdedele wabuyela kweZimnyama.
"Mhlawumbe kungcono ngingakhulumi ngakho. Sengivele ngiphawulile. Ungiphoxe kakhulu ngoba lokuya kumaka akuyona into ofuna ukuyibona yenziwa ngumdlali weqembu enidlala nalo nokungaqeda ikusasa lomunye umdlali kanjeya. Akufanele kushayelwe ihlombe... kodwa ngiphoxekile ngendlela akhulume ngayo nami.
“Ngizizwe ingangifanele... ikakhulukazi uma yenziwa uyena. Mhlawumbe ngizizwa ngijabule kodwa kunokujabha phakathi ngoba ngiyakwazi iqembu elimenzele khona. Ngiyazi mina uqobo engimenzele khona. Angifuni ukuhlala lapha ngikhulume ngezinye zezinto kodwa kulungile. Ngicabanga ukuthi impilo injalo. Ngizokwamukela njengoba kunjalo, ngiqhubekele phambili," kusho uMokwena.
Ukuwina iCarling kwesule izinyembezi abeSundowns kwazise ihlulekile ukuvikela indebe yeMTN8 emasontweni adlule. IWafa Wafa idliwe yiPirates emuva kokuxebula AmaZulu kowamanqamu. Indebe yeCarling bekuqala ukuthi idlalelwe ngamaqembu amane avotelwe ngabalandeli.
"Ngiyalibongela leli qoqo labadlali engingakwazi ukuyeka ukulincoma ngoba lisebenza ngokukhuthala nokuthembeka. Ngizizwa ngihloniphekile ngokuba ngumqeqeshi wabo. Umgomo kwiMamelodi Sundowns ukuwina yonke umdlalo. Uwine imidlalo yobungani, uwine izindebe, kufanele uwine uma siziqeqesha," kusho uMokwena.