AKATHUKILE umqeqeshi weMamelodi Sundowns, uRhulani Mokwena, ngokugqoza kwamagoli esilomeni somdlali wakhe, uCassius Mailula, osembangweni wemiklomelo emikhulu kwiPremier Soccer League kule sizini.
UMailula (21), akusekho ukufunisela ekutheni ungowakhe umklomelo we-PSL Young Player of the Season ka-2022/2023 kodwa indaba isisekutheni angase aphinde adle nemikhulu imihlanganiso okuyi-PSL Footballer of the Season ngokunjalo ne-PSL Players’ Player of the Season.
Emiklomelweni emikhulu ubanga nozakwabo kuMasandawana, uPeter Shalulile noMonnapule Saleng wezimbangi, i-Orlando Pirates.
Okudala lokho ngamagoli akhe angu-14 namane awakhile sekuhlanganiswe yonke imiklomelo aseyidlale kule sizini.
Ayisishiyagalolunye emidlalweni engu-15 kwi-DStv Premiership kanti mahlanu emidlalweni eyisishiyagalombili ye-Caf Champions League awashayile.
Konke lokhu kwenza kube nemibuzo ngokuthi ugcine ukubhakuzisa inethi ngoMashi 14 nonyaka, okungavule ngalo inkundla benquma iRoyal AM ngo 5-1 koweligi (lolu daba lushicilelwe ngaphambi komdlalo weSundowns neStellenbosch FC wama-quarterfinal eNedbank Cup obuse-Athlone Stadium, eKapa izolo ebusuku).
“Ngeke nikholwe ukuthi kade ngikhuluma naye ngimkhombisa ama-video emidlalo yakhe yakamuva, wabe esethi kimi, ‘mqeqeshi, ngidinga ukuhamba ngezinyawo ngingafake zicathulo’. Usho kanje,” kulandisa uMokwena ngokuphumuza inethi kukaMailula.
“Ngeshwa, kubadlali abasebancane kumele wamukele ukuthi usakhokha izindleko zesikole futhi indlela yokufunda kubo iyodwa, wukwenza amaphutha.
“Ngokwami kuyisibusiso esikhulu kabi ukuzilolonga noThemba Zwane noMarcelo Allende (okaputeni beSundowns) ngokunjalo noDenis Onyango noRonwen Williams.
“Mina ngingumdlali oneminyaka engu-17 noma engu-16 ubudala, ngangingenza noma yini ukuba kulowo musa.”
Ngenyanga edlule uMaliula ubizelwe okokuqala kwiBafana Bafana, adlale kuyo imizuzu engaphansi kuka-35.
Lokho kushiye uMokwena ekhala ngokuthi bekumele okungcono abe sesikwatini se-Under 23, okuvele kubukeke simdinga sibhekene neCongo, egcine isikhipha kwi-Under 23 Afcon ezokuba se-Egypt ngoNovemba.
Kule midlalo kuzohlungwa amazwe azomela i-Afrika kumaParis Olympics.
Nokho-ke, kulindelwe uMailula angasali esikwatini sikaHugo Broos esiya kwi-Caf Africa Cup of Nations e-Ivory Coast ngoJanuwari.