IMARUMO Gallants ihlabise uDan Malesela ikhefu lenkani emuva kokuphikwa kwakhe imiphumela kusukela efikile kuyo ngasekuqaleni kwesizini esuka kwiRoyal AM, nakhona ahambe ngendlela edidayo.
Emuva kwamahemuhemu aqale ukusabalala ngeSonto kodwa uMalesela ewaphika, agcine eqinisekisiwe ngesitatimende ngusihlalo weGallants, u-Abram Sello.
Lesi sikhulu asigcinanga ngkuchitha uMalesela kepha nosomaqhinga weqembu uHarris Cheu naye ubalwa nabahlatshiswe ikhefu.
Kulesi sitatimende sikaSello uqinisekise ukuqasha kwakhe uDylan Kerr (ogcine ukubonakala kwiSwallows FC), njengenduna yabaqeqeshi abazobe beholwa nguRaymond Mdaka ozobamba asizwe nguSly Mosala opheka iGallants kwiDStv Diski Challenge (DDC).
Akwethusi kangako nokho lokhu okwenziwe yiGallants kwazise emidlalweni engu-18, uMalesela unqobe emibili kuphela okushiya leli qembu endaweni yokugcina kwi-log.
Ukukhala kwenduku ye-Orlando Pirates ngoMgqibelo kuphinde kwashovela phansi leli qembu osekunesikhathi libambe ibhuleki.
Ukugqoza kwemiphumela kuze kwaqubula amahlebezi okuthi usekhonjwe indlela uMalesela ngalo belu iSonto kumataniswa uKerr nalo msebenzi.
Ukuphikile lokhu ngeSonto ebusuku uKerr ngesikhathi ethintwa yiSolezwe ngalolu daba.
“Umthetho wawo amaphephandaba angeSonto! Ayikho into enjalo,” usho kanje evala ucingo.
NoMaselela ukuphikile ukuthi usephelelwe ngumsebenzi ngesikhathi ekhuluma nabezindaba eqeda ukushaywa yiPirates.
Yize bobabili laba baqeqeshi beqale bazihlangula kugcine kuvelile ukuthi amahlebezi abenobuqiniso kodwa akuzange kwethuse uma uzowunaka umlando weGallants ngokuhamba nokufika kwabaqeqeshi esingabala kubo, yena uMalesela, Sebastien Migne noRomain Folz (osekuMaZulu).
Ngokomlando, uKerr, ngumqeqeshi obekuvele kufanele imlande iGallants ngoba unomlando omude wokuvikisa amaqembu akuleli izembe esingabala kuwo iBaroka FC, Black Leopards neSwallows.