INHLOKO yabaqeqeshi beMamelodi Sundowns, uManqoba Mngqithi, icobelele uDan Malesela ocija iMarumo Gallants ngeqhinga elingamsiza ukuqeda ishobolo lokuxoshwa njalo phezu kokuba edlalisa ibhola elithakaselwa ngabaningi.
UMngqithi weluleka uMalesela nje, amaqembu abo azobhekana kowandulela owamanqamu eCarling Knockout Cup ngeSonto ngo-3 ntambama eSeisa Ramabodu Stadium, eBlomfontein. Indlela ebheke kulesi sigaba amaBrazillians ayicabe ngokubhaxabula iLamontville Golden Arrows neKaizer Chiefs. IGallants idlule kwiPolokwane City nakwiStellenbosch ebingompetha beCarling bangesizini edlule.
UMalesela ucashunwe izikhawu ekhala ngokuba nebhadi lokuhlala exoshwa nakuba edlalisa ibhola elihle. Kamuva ubebalisa ngababize ngezincelebane ezixoshisa abaqeqeshi. Emaqenjini ahlala emxosha aphinde amlande, kuhamba phambili iChippa United. Amanye yiyona iGallants neTS Galaxy.
UMngqithi utshele abezindaba ukuthi sekuphele isikhathi eside engumlandeli kaMalesela, wameluleka ngokuthi kuzomele ibhola alibuke ngokubanzi, angagxili kuphela endleleni acabanga ngayo. Lo mqeqeshi uqhube wathi yena ukholelwa ekutheni indlela yokudlala ilawulwa yisimo osuke ubhekene naso ngaleso sikhathi.
"Uma uzobambelela kuphela ohlotsheni oluthile lwebhola ungazithola ungafiki lapho kumele ngabe ukhona. Nakuba ngiwumlandeli womqeqeshi uDan kodwa ngihlale ngikhononda ngokuthi akasifundi isimo adlala ngaphansi kwaso. Uma izitha zenza amaphutha awuhlobo oluthile kungani ungazijezisi? Akumele ngihlale ngizitshela ukuthi ngeke ngishintshe kulokhu engikholelwa kukhona," kubeka uMngqithi.
KwiGallants, uMalesela owayeqeqesha enkulisa yeSundowns, uhlezi ngesinqa esisodwa kwazise usawine kanye emidlalweni eyisithupha yeBetway Premiership. Emasontweni adlule, kusabalale izinkulumo zokuthi abaphathi abaneme ngendlela iqembu elenza ngayo futhi kungenzeka uMalesela akhonjwe indlela.
“Ukuze ahlale ekwazi ukugcina umsebenzi uDan, kuzomele adlale ngendlela ezomelana nesimo abhekene naso. Abaphathi bethu ababheki ukuthi udlalisa ibhola elinjani, bafuna ukunqoba kuphela. Ngebhadi uma leli bhola lakho elihle lingayilethi imiphumela, uphuma ngesango. Iningi lamaqembu eliqasha uDan liyamxosha liphinde limbuyise ngoba liyamazi ukuthi uyalazi ibhola."
UMngqithi uthe uyajabula ukuthi uzobhekana noMalesela ngoba uyazi ukuthi udlalisa ibhola elimnandi kodwa ngeke ubelula umdlalo wabo neGallants. Uthe okubuye kube yingozi uMalesela unomlando wokwenza kahle ezinkomishini. UMngqithi uthe nakuba amalungiselelo alo mdlalo bewaqale izolo ngoLwesihlanu, kodwa uthe umsebenzi omningi sebewenzile kwazise bahlazinye imidlalo emine yeGallants.