UNYAKA uzowuvala nge-Africanbank Soweto Marathon, uLoveness Madziva onqobe eminxeni emithathu kumaHollywoodbets AC Awards abengempelasonto edlule eThekwini.
Le ntokazi yaseZimbabwe, ihlabane ngendondo yeKZN Best Female Athlete of the year, KZN Moment of the Year nesheke lika-R10 000 ngenxa yokunqoba nowe-Isavel Roche-Kelly Medal.
Inikwe lo mklomelo ngokulala endaweni ka-13 kwiComrades Marathon yalo nyaka ngesikhathi esiwu-6:34. 27
Yenze lokhu ekubeni beyiqala ukuyigijima.
Lo nyaka iwuvule ngokunqoba iNelson Mandela Bay's Runifield City 50km (3:22.49).
Ilandele ngokulala isibili kwiPrince Mangosuthu Ultra 52 Marathon (3:22.38) kwathi kwiTotalsport Two Oceans 56km Marathon yaphuma isithathu (3:38.00).
UMadziva (34) ubonge wanconcoza ekilabhini yakhe, iHollywoodbets AC ngokumhlonipha ngale ndlela.
"Le miklomelo iyangigqugquzela ukuthi ngenze kahle nasemijahweni ezayo. Le kilabhu ayifani namanye, iyabanakekela abagijimi bayo. Ngikhumbula ngiyijoyina ngoDisemba ngo-2022. Ngingakagijimi nowodwa umjaho, ngathola ukuthi ngikhulelwe. Ngangizitshela ukuthi izoyinqamula inkontilela yami. Nokho yangeseka ngakho konke. Ngizohlale ngilwela ukuphakamisa igama layo," kubeka uMadziva.
Uveze ukuthi uzovala unyaka ngokugijima iSoweto Marathon ezoba ngoNovemba 3. Nyakenye akenzanga kahle kulo mjaho njengoba engawuqedanga.
"Ngaphuma ku-30km ngenxa yokuba nenkinga yokuphefumula. Kulokhu ngizoya eGauteng kusasele amasonto ukuze ngizozijwayeza nesimo sezulu sakhona."
Omunye umgijimi wesifazane onqobe indondo ebibhekiwe emiklomelweni, uCian Oldknow ohambe neyeBest National Female Athlete of the year.
UNokukhanya Memela unqobe eyeKZN Most Improved Women Runner.
Abesilisa baqwaqwadwe emakhanda uStephen Mokoka ngeyeBest National Athlete of the Year.
USimphiwe Zulu uhambe nezintathu zaKwaZulu-Natal. Uhambe neBest Male of the Year, Social Media Personality of the Year neMost Consistent of the Year.
Kwezinye, uLindelani Mjwara (KZN Newcomer of the year), Siyanda Gebashe (KZN Most Improved Male Runner), Mfundo Chagwe (Best Male Social Athlete of the Year), Gift Mlotshwa (KZN Volunteer of the year), Thembinkosi Cele (KZN Best Supporter of the year); Graham Wilson (Lifetime Membership of the HAC Awards).