UMA abadlali beKaizer Chiefs bezomlalela umqeqeshi, uCavin Johnson, zizobuya ngokushesha izinsuku zenjabulo eNaturena.
Lona wumbono ka-Enocent Mkhabela odlale ngaphansi kukaJohnson kwiPlatinum Stars nakwiSuperSport United eminyakeni edlule.
UJohnson oqashwe yiChiefs njengenhloko ye-Youth Development Academy ngenyanga edlule, ubanjiswe esokuqeqesha emuva kokuxoshwa kukaMolefi Ntseki ngoMsombuluko.
Ngaphansi kukaNtseki, iChiefs iwine imidlalo emithathu kuphela kweyisishiyagalolunye yeDStv Premiership kule sizini. Ngempelasonto edlule, abalandeli bamthele isibhaxu okwesithathu ngemuva kokukhishwa ngaMaZulu kwaMakhosi emqhudelwaneni iCarling Black Label Knockout.
UMkhabela odlalile nakwiChiefs ngesikhathi somqeqeshi uSteve Komphela, uthe ukufika kukaJohnson kusho ukufika kwenkululeko kubadlali. Ungomunye wabadlali abangawinanga neyokubika indebe eNaturena.
"UJohnson uyabaqonda abadlali baseMzansi nebhola lakhona. Abadlali uyabakhulula futhi uyabakhuthaza ukuthi badlale ibhola abalaziyo inqobo nje uma lokho kuzohlomulisa iqembu. Kulula ukufuna ukumdlalela uma ungumdlali ngoba akakhethi iphela emasini futhi akafihli lutho. Uma kukhona owonile, umdalula esidlangalaleni," kusho uMkhabela osegijima kwi-The Bees kwiMotsepe League yaseMpumalanga.
UJohnson oneziqu zokuqeqesha ze-UEFA Pro License, uqale ukuzibonakalisa ekwiDikwena ngesizini ka-2011/2012. Ekupheleni kweka-2012/2013, ujoyine iSuperSport waficana noMkhabela owayesayine inkontileka yesibambiso isizini isephakathi. KuMatsatsantsa ukhonjwe indlela ngo-2014. UJohnson uthole indondo yeCaf Champions League eseyiphini likaPitso Mosimane kwi-Al Ahly yase-Egypt ayijoyine ngo-2020.
"Kulula kubadlali ukumdlalela ngoba uba ngubaba kubona. Ufuna ukwazi konke ngomdlali ngamunye nokuthi uhlala nobani. UJohnson uyakwazi ukwenza umdlali akhiphe wonke amandla anawo enkundleni ngenxa yobudlelwano abakhayo. Ngiyamjabulela kakhulu ngesikhundla sokuqeqesha iChiefs. Ungumqeqeshi waseMzansi okuyinto enhle ukuthi la maqembu amakhulu aqeqeshwe yibona. Ngaphansi kukaJohson abadlali beChiefs abalindele inkululeko enkundleni," kusho uMkhabela.
Amaqhinga kaJohnson azovivinywa okokuqala uma iChiefs isivakashela iLamontville Golden Arrows eMpumalanga Stadium eHammarsdale, ngoMgqibelo, ngo-3.30 ntambama.