XOLILE MPISANE
USALANGAZELELA ukwengeza empumelelweni aseyithole ne-Orlando Pirates uHappy Jele, emuva kokusayina inkontileka entsha naleli qembu.
UJele (34) usayine inkontileka yonyaka owodwa, ezophela uma kusongwa uJuni ngonyaka ozayo. Lisekhona ithuba lokuthi yelulwe ngomunye unyaka.
Waqala ukugijima kweZimnyama ngo-2006, usedlale imidlalo engaphezu kuka-350 futhi ungukaputeni kusukela ngo-2017.
"Kuyangijabulisa ukuthi sengisayine inkontileka entsha," kusho uJele. "Njengomdlali ngikholwa ukuthi kuningi engisazokwenza nengisazokuzuza naleli qembu," kusho uJele kwi-website yePirates.
AmaBhakaniya aphinde aqinisekisa ukuthi seligqabukile ifindo phakathi kwawo noGladwin Shitolo, obebolekiswe kwiLamontville Golden Arrows.
UJustice Chabalala, obekumenyezelwe ukuthi uzobolekiswa kwiChippa United, usezojoyina iSekhukhune United.