Kaizer Chiefs (1) (2)
TS Galaxy (0) (2)
I-TS GALAXY iqhubekile nokuba yiphela endlebeni kwiKaizer Chiefs iyibamba ngo 2-2 ngoLwesithathu koweDStv Premiership, eFNB Stadium, eGoli.
Okube yisinongo kulo mdlalo ukushaya igoli lokulinganisa kukaBernad Parker obebhekana okokuqala neChiefs selokhu ajoyina iGalaxy.
Uhambe kuMakhosi esehlale iminyaka ewu-11.
Kulo mdlalo ungene ngomzuzu ka-31 esikhundleni sikaLifa Hlongwane.
Ucishe walibeka phakathi eqala ukulithinta ngoka-32 kade kuyikhona.
Kube ngenye ikhona, wase elivalela phakathi ngoka-33.
IChiefs yiyo ebibone imbobo yepali kuqala ngonyawo luka-Ashley Du Preez ngomzuzu wesikhombisa.
Ngemuva kokushaya igoli kukaParker ozakwabo banikele kuye bejabula yena wavele wabheka phansi, engakhombisi ukujabula.
Elesibili leGalaxy lingqofwe wuDjakaridja Traora wase-Ivory Coast ngoka-41. Ngoka-81 uKeagan Dolly ushaye elokulinganisa, obekuyi-free kick.
Kulo mdlalo iChiefs yenze izinguquko ezine esikwatini esidlale neChippa. Iqale ngoBruce Bvuma emapalini, Zitha Kwinika, Khama Billiat noGeorge Matlou. Ushintsho lukaBvuma lwenzeke ngaphambi kokuthi umdlalo uqale njengoba bekade kubhalwe ukuthi kuzovimba u-Itumeleng Khune. Umqeqeshi weChiefs, u-Arthur Zwane ngemuva komdlalo, uthe uKhune uzwe izinhlungu ngesikhathi bezivocavoca, odokotela base beluleka ngokuthi angadlaliswa ngoba lokho kungenza isimo sibi kakhulu.
IGalaxy yenze ushintsho lwabadlali ababili esikwatini esibambane neSwallows. Ifake u-Aphelele Teto noLindokuhle Mbatha.
Ngemuva kokuthi Amakhosi eshaywe yiChippa ngempelasonto edlule, abalandeli bawo bebehlalele ethembeni lokuthi azovuka azithathe. Bebebheke nokuthi iqembu labo liqede ukuchanasa kweThe Rockets emakhanda abo. Bekuwumdlalo wesikhombisa lamaqembu ethulana phezulu. NgoLwesithathu bekungokwesine edlala ngokulingana kweyeligi. Iqembu ngalinye lisanqobe owodwa weligi.
IChiefs kumele izisole yona ngokungawunqobi lo mdlalo. Kuzona zombili iziwombe ithole inqwaba yamathuba. Bekumele kuyiwe ekhefini isishaye amagoli athathu. IGalaxy seyishaye elokulinganisa ivele yacobeka.
Sisanda kuqala isiwombe sesibili, iChiefs ifake uSegolela Sekgota ofike wayivusa emaqandeni. Unozinti weThe Rockets, uMelusi Buthelez,i wenze omkhulu umsebenzi evimba amabhola abadlali abanjengoBilliat Dolly nabanye. Ukucindezela kwayo kugcine kube nomphumela omuhle wokushaya elokulinganisa. Noka-88, uYusuf Maart uyeke uqekelele sekusukume wonke umuntu umdlalo usuzophela.
NgeSonto iChiefs izodlala naMaZulu FC kowandulela owamanqamu weMTN 8. IGalaxy izobuyela enkundleni koweligi neSekhukhune ngo-Okthoba 30.