USIHLALO woLundi United, uSanele Hlongwa, ukholwa wukuthi ukwesekwa uMasipala uLundi kuzokwenza omkhulu umehluko ekukhuthazeni abadlali baleli qembu elingomakoti kwiSafa KwaZulu-Natal ABC Motsepe League elivule isizini ngokunqoba ngempelasonto.
I-United iguqise iDlangezwa Hellenic ngo 1-0, eMthunzini Soccer Field, eMpangeni, ngoLwesihlanu.
Leli qembu laseNkonjeni, oLundi, liguqisa iHellenic ngoLwesihlanu nje, ngoLwesine belimenywe ngumasipala wasoLundi lapho belemukeliswa khona ngejezi lokudlala elixhaswe ngalo yilo masipala oholwa nguWilson Ntshangase
“Ukwesekwa kwethu ngumasipala wendawo kuyasikhuthaza sonke njengeqembu, kusinika nomdlandla wokusebenza ngokuzimisela ukuthatha iqembu silise phambili. Ukuphatha iqembu kulesi sigaba seMotsepe League kuyizindleko. Sinethemba lokuthi umasipala wakithi usazosihlangabeza nangokunye njengoba bethembisile ukuthi basazobheka isimo sabo sezimali ukuthi yikuphi lapho abangasihlangabeza khona.”
I-United neJunior Eleven yaseMnambithi yiwona maqembu angomakoti kwiKZN Motsepe League kule sizini kulandela ukuphumelela kwawo kumaPlay-Offs esifundazwe eSafa KZN Hollywoodbets Regional League ayedlalelwa eMgungundlovu, ngoJuni.
I-United izodlalela ekhaya kowesibili wesizini noMkhumbane Classic, ePrince Mangosuthu Regional Stadium, oLundi, ngoMgqibelo ngo-12 emini.
Imiphumela yangempelasonto yeSafa KZN ABC Motsepe League:
Stream A: Dlangezwe Hellenic 0-1 Ulundi United; Durban Pioneers 2-0 Umvoti FC; Summerfield Dynamos 1-1 Midlands Wanderers; Muzi King Masters 0-0 Njampela FC
Stream B: Chess FC 0-0 Newcastele All Stars; Drakensberg FC 0-2 Umsinga United; Junior Eleven 1-1 KwaMashu Durban Knights; Ethekwini Coastal 1-3 Mkhambathi FC; Ditlou FC 3-0 Mshwathi United