ISIKHULU esiphezulu kwiSuperSport United, uStanley Matthews, sidalule okwenze bamshaya ngesithende umqeqeshi uDaine Klate okumanje akanalo iqembu aliqeqeshayo.
UKlate, owayengumdlali wayo iSuperSport kusukela esemncane, ukhonjwe indlela yiChippa United ngoSepthemba ngemuva kokuhola iqembu emidlalweni eyisikhombisa yeDStv Premiership. Wayekhushulelwe kulesi sikhundla ngemuva kokwenza umsebenzi oncomekayo neqembu leDStv Diski Challenge ngesizini edlule. UKlate uhlale ebhentshini eqenjini elikhulu emidlalweni eyisikhombisa, wanqoba owodwa, wadlala emibili ngokulingana, wase ehlulwa kwemine.
Esengumdlali kwiSuperSport, wawina izindebe zeligi ezintathu ngaphansi komqeqeshi uGavin Hunt osebuyele kuMatsatsantsa. Washiya iSuperSport, wajoyina i-Orlando Pirates ngaphambi kokuhlangana noHunt bawina izindebe kwiBidvest Wits.
UKlate uyeke ibhola eseyibamba kwiChippa, wanikwa umsebenzi wokuqeqesha iqembu leDiski Challenge.
"Ngeke ngibe nenkinga yokubuyisa uKlate eqenjini ngesikhathi esifanele. Bengifuna ukumbuyisa ngaphambi kokuthi ajoyine iChippa. Ngicabanga ukuthi manje usefuna ukuba ngumqeqeshi ngokugcwele. Ngakho uma esebheke lapho kufanele aqhubeke. Kodwa ukuba bekunesikhala somsebenzi ohlukile futhi naye ekujabulela ukusebenza ethimbeni nabaqeqeshi abafana noGavin, Andre (Arendse) noGrant (Johnson), nginesiqiniseko sokuthi bengizombuyisa uKlate," kusho uMatthews ngemuva kokubuzwa ngokuthi bake bambheka yini uKlate njengomunye ongeza azosebenza kuleli qembu.
"Kodwa engingafuni ukukwenza ukubuyisela umuntu ezingeni eliphansi kunaleli afuna ukufika kulona. Lokho wukumphindisela emuva. Kade esengumqeqeshi (weqembu elidlala esigabeni esiphezulu), manje uzibona kufanele ahlale kulelo zinga. Uma ngimthatha ngimenza inhloko yabaqeqeshi noma ngithi akazoqeqesha iqembu leDiski Challenge noma ngithi akabe yiphini lesibili likaGavin, kungenzeka lokho kungabi yinto ayifunayo."
KwiSuperSport uKlate ubezojoyina abanye ababengabadlali bayo asebengabaqeqeshi okukhona kubona u-Arendse oyiphini likaHunt, Thabo September opheka iqembu leDiski Challenge noGrant Johnson ongumqeqeshi wonozinti. UJabu Maluleka usanda kuqashwa njengozocija abadlali ekushayeni ama-set piece.
"Indlela ayiyona uKlate njengomuntu uyohlala emukelekile ehhovisi lami nasempilweni yami. Ungumfana omncane engamsayinisa eneminyaka engu-17. Ngangikhona ebhiyozela ukuhlanganisa iminyaka engu-21 azalwa. Ngangikhona kuzalwa zonke izingane zakhe futhi ubekhona emaphathini ezami. Ngisondelene kakhulu naye. Uyena umdlali owine izindebe ukubadlula bonke kwiPSL futhi uwumkhiqizo weSuperSport United esiziqhenyayo ngawo. Ngiyamthanda uDaine Klate," kusho uMatthews.
ISuperSport izobuyela enkundleni ngoDisemba 30 isiyobhekana neMarumo Gallats koweDStv Premiership eLucas Moripe Stadium, ePitoli.