UBONGE ukuthi bagcine bebuya namaphuzu aphelele ngesikhathi benqoba iTS galaxy ngo 1-0 emdlalweni weHollywoodbets Super League ngoMgqibelo umgadli weMamelodi Sundowns Ladies, u-Andisiwe Mgcoyi.
Igoli elinqobele amaSandawana amaphuzu amathathu lishaywe nguyena uMngcoyi esiwombeni sokuqala.
Bekungokwesibili kulandelana iqembu likaJerry Tshabalala linqoba umdlalo ngo 1-0 kwazise belidlule ngendlela efanayo libhekene ne-University of Johannesubrg kodlule.
ISundowns isazihola phambili kwi-log ngamaphuzu angu-59 emidlalweni engu-22. Iyishiya ngamaphuzu angu-12 i-University of Western Cape (UWC), esihlanganise amaphuzu angu-47 emidlalweni engu-19.
“Umdlalo ubunzima kodwa besikulindele lokho ngoba akukaze kube lula ukubhekana neTS Galaxy. Ngaphambi kwalo mdlalo umqeqeshi ukhulume nathi wasitshela ukuthi kufanele siyinqobe yonke imidlalo esele,” kusho uMgcoyi.
“Siyiqembu elijwayele ukushaya inqwaba yamagoli, ngakho-ke asiphatheki kahle uma sihluleka ukwenza lokho. Sijabule ngoba leli goli elilodwa lisitholele amaphuzu aphelele kodwa sisazosebenza kanzima ukuze siguqule lesi simo esikusona sokuncipha kwamagoli.”
I-UWC iqinisekisile ukuthi ibuya ngomfutho omuhle kwiSuper League kulandela ukudla kwayo umhlanganiso emqhudelwaneni weCosafa wokuhlungela iCaf Champions League.
Leli qembu elicijwa nguThinasonke Mbuli lithele phansi iFirst Touch FC ngo 2-0 e-Old Peter Mokaba Stadium ngeSonto ntambama. Amagoli e-UWC ashaywe nguBongeka Gamede noNondumiso Manengela.
Kubhekwe ngabomvu ukuthi iligi iqinisekise ukuthi iSundowns ne-UWC bazobhekana nini kwiligi kwazise ukuthi umdlalo wabo owawuhlelelwe inyanga edlule wahlehliswa ngenxa yokuthi womabili amaqembu ayebambeke kweminye imiqhudelwano.
Ngesikhathi lawa maqembu egcina ukubhekana eKapa ngoMashi kwanqoba i-UWC ngo 1-0.
Khonamanjalo, kusinda kwehlela emaqenjini alengelwa yizembe, iThunderbirds FC neLindelani Ladies, asaqhubeka nokubulawa ngesibhaxu.
ILindelani ixetshulwe yiTUT Matsatsantsa ngo 3-0, iThunderbirds yabhudluzwa yiRichmond United ngo 4-1. Aya ngokushabalala amathemba okuthi lawa maqembu asazokwazi ukudlula lawa ahlezi ngaphezu kwawo, aqhubeke nokudlala esigabeni esiphezulu ngesizini ezayo.
Imiphumela yemidlalo yeHollywoodbets Super League kule mpelasonto: University of Fort Hare 3-2 University of Pretoria, Lindelani Ladeis 0-3 TUT Matsatsantsa, Durban Ladies 1-1 Copperbelt FC, Mamelodi Sundowns 1-0 TS Galaxy Queens, Richmond United 4-1 Thunderbirds, Royal AM 3-0 City Lads, JVW 1-1 University of Johannesburg, First Touch 0-2 University of Western Cape.