UNGENE emabhukwini omlando angemahle umdlali wasemuva we-Orlando Pirates, u-Olisa Ndah, umkhonto wakhe ugwaza ekhaya okwesibili nokunqobise iKaizer Chiefs okwesihlanu imidlalo ilandelana kulo mdlalo onedumela womkhaya baseSoweto.
UNda, ongene ngesiwombe sesibili emuva kwekhadi elibomvu elitholwe ngukaputeni wePirates - u-Innocent Maela, nangesizini wehlelwe ngumshophi ofanayo umkhonto wakhe ugwaza ekhaya nakhona okwanqoba iChiefs esibaphuze inyongo.
Lo mdlalo ubuthanyelwe zinkumbi zabalandeli ezingu-78 182 kanti kuyiwe kuwo ecushiwe umqeqeshi weChiefs, u-Arthur Zwane ngenxa yokubhimba kwezinto.
Nokho, bese kunehaba nje kwazise bebeshiyana ngamaphuzu amathathu kuphela nePirates okunamuhla bayalingana ngamaphuzu angu-31 emidlalweni engu-21.
Izinto ziqale ukuyivuna iChiefs ngomzuzu ka-60 ngekhadi elibomvu likaMaela.
Bekungangabazisi ukunikwa kukaMaela ikhadi elibomvu kwazise ubesesele yedwa odongeni equmba phansi uChristian Saile ngemuva komugqa we-18 esemahhashini ebheke ezintini zikaSipho Chaine.
Indlela ebezithengana ngokuhlukana, ukuphuma kwalelo khadi kunike isithombe sokuthi izinto sezizovuna iqembu lasekhaya.
Ukuhlangabeza leso simo, osomaqhinga bePirates baxukuze uhlelo bekhipha uThembinkosi Lorch noNdabayithethwa Ndlondlo ngoBen Motshwari noNdah, ongasalazi ijezi kusuka kwaqina amahlebezi amumatanisa neqembu lase-Italy.
ULorch bekuvele kungalindelwe awugijime wonke umdlalo ngenxa yokungabiqatha ngokwanele kwazise unemidlalo embalwa ebuye ekulimaleni.
EkaNdlondlo ibingokunika umoya omusha enjinini kwazie uMotshwari uyalekela nasekuvikeleni udonga njengoMiguel Timm abeseyibambe naye.
UNda ubegcine ukudlala oweligi ebhekene neChiefs ngo-Okthoba.