UKAPUTENI nesitobha se-Orlando Pirates, u-Innocent Maela, ufunga uyagomela uthi bazowuqedela namuhla umsebenzi emdlalweni wasekhaya badlulele emzuliswaneni olandelayo we-Caf Champions League ngokugudluza i-Disciples FC yaseMadagascar.
IPirates ebambane ngo 0-0 ne-Disciples ngeledlule, eNational Sports Complex eSaint Pierre, eMauritius, emdlalweni womlenze wokuqala wesigaba sokuqala sokuhlungela ukungena kowamaqoqo kwi-Champions League, ibuyela ensimini kowomlenze wesibili e-Orlando Stadium, eSoweto, namuhla ngo-7.30 ebusuku.
IPirates iza kulo mdlalo ingaphansi kwengcindezi yokubuyisa isithunzi kulandela ukugxekwa kwayo ngabalandeli ngokubanjwa yileli qembu lase-Madagascar elingaziwa ebholeni lase-Afrika. Okunye okuvuse izinhlonze ngokudlala ngokulingana kwe-Pirates naleli qembu, yisilonda sokuthi ngesizini edlule, yaphuma kungazelelwe emzuliswaneni wesibili wokuhlungela amaqoqo. Yakhishwa yiJwaneng Galaxy yaseBotswana.
“Noma kuphi lapho sidlala khona sisuke sifuna ukunqoba futhi uma singanqobi siyaphoxeka. Siwatholile amathuba amaningi okushaya amagoli okuyiwona ebesinganqoba ngawo kulowa mdlalo. Yithina esasiwuphethe umdlalo, kwaba yishwa nje ukuthi singanqobi. Ngakho simagange ngalo mdlalo esiyowudlala (ne-Disciples) futhi sifuna ukuwunqoba, akukho okunye,” kwethembisa uMaela, ekhuluma nabezindaba izolo.
“Sidlale umdlalo wethu wokuqala ekuhambeni neqembu ebesingalazi kodwa manje sesiyakwazi okufanele sikulindele kubona. Okuhle ukuthi asibuyanga nomphumela omubi ekuhambeni, ngakho manje sinethuba elihle njengoba sizodlalela ekhaya.”
Njengoba i-Disciples nayo kungangatshazwa ukuthi iyazinika ithemba ngokwedlulela emzuliswaneni olandelayo njengoba ikwazile ukubamba iPirates, uMaela ukuqonda kahle ukubaluleka kokunqoba ukugwema ukuphoxa abalandeli babo okulindeleke baphume ngobuningi ukuzobeseka ekhaya.
“Sizokwenza konke okusemandleni ukwedlulela esigabeni esilandelayo. Yilokho esikuphokophele singabadlali nethimba labaqeqeshi, ukulwela ukwedlulela esigabeni esilandelayo samaqoqo.
Ukudlala phambi kwabalandeli bethu, yikho kanye okuzosikhuthaza ekubhekaneni nezimbangi zethu. Sizobe sinabalandeli bethu (e-Orlando), kuzoba ngumdlalo omuhle kithina sonke.”
IPirates idinga ukunqoba kumnyama kubomvu kulo mdlalo wanamuhla. Izitha zona zingadlula noma zingagcina zidlala ngokulingana ngamagoli
Komunye umdlalo we-Caf, iStellenbosch FC izodudulana neNsingizi FC yase-Eswatini kowomlenze wesibili wokuhlungela amaqoqo we-Confederation Cup kusasa ngo-3 ntambama, eMoses Mabhida Stadium eThekwini. IStellies ihamba phambili ngo 3-0.