UVUSUMUZI " Kanu" Vilakazi ongomunye wabaqeqeshi beLamontville Golden Arrows, ubalisa ngesihlava esihlasele abadlali bakhe sokuvumela izitha ukushaya amagoli ngemizuzu yokugcina.
Ngempelasonto edlule Abafana Bes'thende baphinde bashaywa yiMaritzburg United ngo-1-0 kowomkhaya obusePrincess Magogo Stadium, KwaMashu.
ITeam of Choice inqobe ngegoli lika-Ali Meza alishaye esikhathini esingeziwe sikanompempe.
Bekuwumdlalo wesibili kulandelana ezikaVilakazi zithelwa umpetshisi. Ngaphambi kwalo mdlalo zishaywe i-Orlando Pirates ngo-3-1.
Nakulo mdlalo zangenelwa ngamagoli amabili esikhathini esingeziwe sikanompempe.
Nasemdlalweni i-Arrows eyanqoba kuwo ngo-2-1 kwiSuperSport Unted yavumela izitha ukuthi zishaye elokubika sewuyophela umdlalo.
UVilakazi osizana noMabhuti Khenyeza ekucijeni Abafana Bes'thende, uveze ukuthi baphoxe kakhulu ngokudliwa yiMaritzburg.
" Ukukhuluma iqiniso besikhonya kulo mdlalo, besiyihlelele kahle iMaritzburg, sibe nebhadi. Okumele abadlali bethu bakuqaphele manje ukuhlale begxilise ngokwanele imiqondo yabo emdlalweni. Ngeke phela ukuthi thina siyohlale singenelwa amagoli njalo uma sekuyophela umdlalo.Kulo mdlalo iMaritzburg isizumile. Senze iphutha elilodwa sasesijeziswa. Sidliwe ekubeni sakhe mhlawumbe amathuba ayisikhombisa kuya kwayisishiyagalolunye. Yingakho unozinti weMaritzburg eqokwe njengomdlali wosuku. Sisalwa nokuthi siqine phambili siphinde senze isiqiniseko sokuthi asingenelwa amagoli. Akukuhle ukuthi siyahluleka ukusebenzisa amathuba. Ngeke sililahle ithemba, sizolwa kuze kulunge. Ngeke kusisize ukubeka izaba. Ayingiphethe kahle neze indawo esikuyo kwi-log yeDStv Premieship. Ithina esizifake kule nkinga kumele sizikhiphe thina," kubeka uVilakazi. Emdlalweni wangempelasonto edlule i-Arrows iye kuwo ngaphandle kukakaputeni wayo uThabani Zuke.
Ezivelayo zithi ngeke adlele isizini yonke. Walimala idolo ngesikhathi ngesikhathi iqembu lakhe lishaywa iKaizer Chiefs ngo-2-0 emasontweni edlule. UVilakazi ukuphikile ukuthi bashaywe iMaritzburg ngoba engekho uZuke.
" Ngeke ngisho ukuthi uZuke uzohlala isikhathi esingakanani. Engikwaziyo ukuthi usazohlala isikhathi eside. Ngikholelwa ekutheni asidliwanga kulo mdlalo ngoba engekho uZuke. Njengoba engekho sesigxile kwabakhona. UShitolo (Gladwin) udlale kahle kakhulu emuva ephebeza izitha. Utshengise ukuba umholi okuyinto ebishoda eqenjini. NgoLwesithathu sizophinde simbophele ngoba udlale kahle kakhulu. Ngeke kulunge ukuthi nangoLwesithathu siphinde sihlulwe. Sizoya kodlala neMarumo Gallants sihambela phezulu".
I-Arrows neGallants bazodlalela eMagogo, ngo-7.30. Nakuba Abafana Bes'thende kungabahambeli kahle kulezi zinsuku kodwa uVilakazi ukholelwa ekutheni bozoqeda le sizini besemaqenjini ayisishiyagalombili aphezulu.