UBONGA ithuba lokubuyela kwiPremier Soccer League (PSL), uMuzi Zimu weKruger United ezobhekana neBlack Leopards, namuhla ngo-3.30 ntambama, eThohoyandou Stadium.
UZimu (34) ongumkhaya kaSiyabonga "Nsimbi" Sangweni, eDondotha, eMpangeni, ungomunye wasebegudle isikhathi kwiMotsepe Foundation Championship. Kulesi sigaba ugijime kwiBlack Leopards, Mbombela United, Real Kings, Royal AM, JDR Stars njengoba esekwiKruger yaseMpumalanga.
Ngesizini edlule, ubedlala kuMkhambathi ogijima kwiSafa KZN ABC Motsepe League ngenxa yokuthi iJDR ayiyivuselelanga inkontileka yakhe kumasizini edlule.
Ukuzimisela kwakhe kuhehe abaqeqeshi beKruger abagcine bemsayinisile ngaphambi kokuqala kweka-2024/25.
"Ngibonga kakhulu kubaphathi nakubaqeqeshi beKruger ngokungibuyisela kwiPSL. Isifiso sami ukuthi ngisize iqembu ukuthi linyukele kwiBetway Premiership. Lokhu ngikubona kwenzeka. Akhona amaqembu akwazi ukwenyukela esigabeni esikhulu nakuba ayefika kwiMotsepe Foundation. Isibonelo iMagesi ebifike ngesizini edlule, kanti neChippa United yakwenza lokhu," kubeka uZimu.
Uthe isifiso sakhe wukuba ngumshayimagoli ovelele eqenjini lakhe nakwiligi. IKruger kubukeka ivuke yazithintitha njengoba ibiqala ukunqoba imidlalo emibili kulandelana kweyakamuva. Ngempelasonto edlule ibhaxabule iLeruma United ngo 4-1. Ngaphambi kwalokho yashaya iCape Town Spurs ngo 1-0.
IKruger isendaweni yesishiyagalolunye kwi-log yeChampionship ngamaphuzu awu-11, emidlalweni eyisishiyagalolunye. Isanqobe kwemithathu, yadlala ngokulingana kwemibili, yadliwa kwemine.
Mayelana nomdlalo weLeopards, uZimu uthe: "Amalungiselelo ahamba kahle. Sizoya kuwo sinokuzethemba ngenxa yale midlalo emibili esiyinqobile. Uma singabuyanga namaphuzu amathathu, kumele okungenani sithole elilodwa."
ILeopards isendaweni yesibili ngamaphuzu awu-17 emuva kwemidlalo eyisishiyagalolunye.
Imidlalo yeMotsepe Foundation:
Namuhla - Ngo-3.30pm: Baroka v Leruma United (Global Stadium); Orbit College v Cape Town Spurs (Olympia Park ); Pretoria Callies v Highbury (TUT); Black Leopards v Kruger United (Thohoyandou).
NgeSonto - Ngo-3.30pm: Milford v Upington City (Princess Magogo); University of Pretoria v Venda (Tuks).