PHEZU kokuba iningi libona uThobani Mncwango esephelelwe ngushatini ngenxa yokwehlela kwiKZN ABC Motsepe League kodwa yena ukuthatha njengesibusiso.
Lo mdlali ozakhele igama kwiPolokwane City, Bidvest Wits nakwiBlack Leopards, usanda kusayina kwiMkhumbane Classic.
Emdlalweni wakhe wokuqala abahlule kuwo uMkhwakhwini ngo-6-2, usuke ebhentshini washaya amagoli amabili waphinde wakhanda ayisibalo esifanayo. Engxoxweni neSolezwe, ubonge wanconcoza kusihlalo woMkhumbane, uSithembiso "Mashalofu" Mabaso ngokwenza isiqiniseko sokuthi wamukelwa kahle.
Uveze ukuthi leli qembu lihlula amaqembu amaningi kwiPSL ngendlela eliphethwe ngayo.
Ebuzwa ukuthi akaziboni yini esephelelwe ngushatini ngokwehlela kwiMotsepe League, uthe: “Empeleni ngibonga uNkulunkulu namadlozi asekhaya ngokuthola leli thuba. Iningi lontanga bami kade lashabalala.
“Ngenhlanhla ngingumuntu osamukelayo isimo, angizilwisi izinqumo zoMdali. Nakuba kunjalo ngiyakholelwa ekutheni ngisengadlala kahle kwiPSL noma amasizini amabili.”
Uveze ukuthi indlela yokubuyela kwiPSL wukuthi asize uMkhumbane unyukele esigabeni esingenhla. Uthe ngesikhathi efika, uDominic Issacs ongumqeqeshi wakhe, umbekele umgomo wokushaya amagoli ayishumi.
“Kuhle ngoba sengisiphungulile isikweletu, sekusele ayisishiyagalombili. Ngiphinde ngijatshuliswe wukuthi ngicijwe nawuSithembiso Ngcobo naye obengumgadli esigabeni esikhulu,” kuqhuba uMncwago onomdlalo owodwa kuBafana Bafana.
“Ngithandazela nokuthi ngiphinde ngiwashaye amagoli uma sesidlala neMuzi (King Masters) ngoMgqibelo.”
Umdlalo wezikaMncwango neMuzi, ungo-3 ntambama, eNgcedomhlophe. EzikaMncwango zikweyesithathu ngamaphuzu awu-21, emidlalweni ewu-11. IMuzi ikweyesithupha ngayishumi.
Imi kanje seyiyonke imidlalo yeKZN ABC Motsepe League: KwiStream A:
NgoMgqibelo: Ngo-3 pm: Mkhwakhwini v Summerfield (Melmoth Rugby); Asande v Breakers (TBC); Muzi v Mkhumbane (Ngcedomhlophe); Njampela v Mtuba ( Prince Mangosuthu).
NgeSonto: Ngo-3 pm: Milford v Wanderers (Empangeni Rugby).
Kwi-Stream B:
NgoMgqibelo-Ngo-1 pm: Midlands v Pioneers (Harry Gwala).
Ngo-3.30 pm: Mkhambathi v Friends (Harry Gwala).
Ngo-3pm: Newcastle v Coastal (Arbor Park); Umvoti v Experience (King Edward Park); Msinga v Drakensberg (Umzisho).