ISIPHEKEPHEKE somdlali wasesiswini kwiMarumo Gallants, uCelimpilo “Zidane” Ngema, sithi ukudlala kahle kwabo emidlalweni yeConfederation of African Football (Caf) Confederation Cup, sekubafake omkhulu umfutho, kwathi gidi isibindi sokubhekana nempi yokusuka emsileni we-log yeDStv Premiership.
IGallants okuyilona qembu elisahlezi emsileni we-log yeDStv Premiership kuze kube manje, lenza okungalindelekile eqenjini elidonsa kanzima emidlalweni yeligi njengoba isaqhubekile nokushaya into ecokeme emidlalweni yeCaf Confederation Cup.
Yiyo neMamelodi Sundowns - eyibambe kwiChampions League neConfederation Cup - emaqenjini aseNingizimu Afrika, asazibophe ngexhama kwabonakala emidlalweni yeCaf.
IGallants izotholana phezulu namuhla ngo-9 ebusuku ne-ASM Alger yase-Algeria, emdlalweni weCaf Confederation Cup, eNelson Mandela Stadium, eBaraki, e-Algeria.
Iza kulo mdlalo nje ibuya ekutheleni isibhaxu ngeledlule ekuhambeni kwiSaint Eloi Lupopo yaseDemocratic Republic of Congo (DRC), ngo 2-1. Ngaphambi kwalokho ibinenebule i-Al-Akhdar yaseLibya, ngo 4-1.
Lokhu kuyibeka ethubeni elihle lokudlulela kuma-quarterfinal eConfederation Cup, njengoba isiqoqe amaphuzu ayisithupha emidlalweni emibili yesigaba samaqoqo salo mqhudelwano kwiGroup A.
Isazodlala owomlenze wesibili ne-ASM Alger ekhaya ngoMashi 3, ilandele nge-Al-Akhdar ekhaya ngoMashi 19, ivale eyamaqoqo nge-Eloi Lupopo ngo-Ephreli 2 ekhaya.
“Ukudlalala kahle kwethu emidlalweni yeConfederation Cup sekusifake omkhulu umfutho, kwalenyusa nezinga lokuzethemba kithi singabadlali. Sizibona sesikulungele ukubhekana nanoma yimuphi umdlalo kungakhathaleki ukuthi oweCaf noma oweligi, noma oweNedbank Cup, ngoba sekuvunguza umoya wobumbano nempokophelo yokunqoba ekhempini yethu, ” kuchaza uNgema ngomfutho weqembu.
Ephawula ngomdlalo wabo ne-ASM Alger, uthe: “Siyazi ukuthi ngeke kube wumdlalo olula esiyowudlala ne-ASM Alger, njengoba kungumdlalo wasekuhambeni. Kodwa siyakwazi esikulindele kubona ngoba sesike sayibuka eminye imidlalo yabo yakamuva.”
Imidlalo yeCaf Confederation Cup:
Namuhla:
TP Mazembe v Monastir (3pm); Saint Eloi Lupopo v Al Akhdar (3pm); Pyramids v ASKO (6pm); Asec Mimosas v Diables Noirs (6pm); Real Bamako v Young Africans (6pm); USM Alger v Marumo Gallants (9pm); Motema Pembe v Rivers United (9pm); FAR Rabat v Future (9pm)