INKAKHA yeJomo Cosmos neBafana Bafana, uMacBeth Sibaya, ikholwa wukuthi ukuyiswa kwemidlalo yeDStv Premiership enkundleni iMpumalanga Stadium, eHammarsdale, kuzovuselela uthando lwebhola kubantu bakule ndawo, kugqugquzeleke nentsha yakhona ekuzimiseleni ngebhola kunakuqala.
ILamontville Golden Arrows ebisebenzisa iPrincess Magogo Stadium, KwaMashu, ukudlala imidlalo yayo yasekhaya yePremier Soccer League (PSL), isibhalise iMpumalanga Stadium, ukuthi isiyinkundla yayo yasekhaya kule sizini ezokwethwasa ka-2023/24 yeDStv Premiership, ezoqala ngo-Agasti 4.
IGolden Arrows izokhangula iMpumalanga Stadium ngokududulana neMoroka Swallows ngo-Agasti 5.
Ilokishi iMpumalanga, laseHammarsdale nakuba lake lakhungathwa wudlame lwezepolitiki ngeminyaka yo-1980 kuya ko-1990 futhi laziwa ngokukhiqiza abadlali bebhola abasezingeni eliphezulu.
Kubona okubalwa uMoses "Skebhe" Khanyeza, Sibusiso "Rhee" Zuma, noMacBeth Sibaya ukubala abambalwa.
"Ngikholwa wukuthi luzovuseleleka uthando lwebhola kubantu baseHammarsdale namaphethelo ngokulethwa kwemidlalo yeDStv Premiership kule ndawo, ikakhulukazi intsha edlala ibhola.
Intsha ikhuthazeka kakhulu uma ithola ithuba lokubuka amaqhawe ayo ebhola eduze, kunokuwabukela kude kumabonakude.
Ngalokho-ke singabona intsha yendawo izimisela kakhulu ngebhola kunakuqala," kusho uSibaya ozakhele igama kwiBafana Bafana eminyakeni edlule.
UMichael Nxasane, ongumlandeli wokuqina waMaZulu FC egatsheni laseHammarsdale, uthi bengabathandi bebhola baseHammarsdale kudala babelilambele ibhola lePSL, ngakho leli thuba bazolibamba ngazo zombili ngokuphuma ngobuningi ukuzobuka imidlalo.
"Yize sazi ukuthi usihlalo weGolden Arrows thina balandeli baMaZulu akasithandi kodwa ibhola siyalithanda, ngaphandle nje kokuba ngabalandeli baMaZulu.
Ngakho-ke, sizoyeseka i-Arrows emidlalweni yayo yasekhaya eMpumalanga Stadium, izizwe isekhaya futhi inokwesekwa okungaphezulu kwalokhu ebikuthola eClermont naKwaMashu," kusho uNxasane.
"Nentsha yalapha eHammarsdale izosizakala kakhulu ngokulethwa kwemidlalo yePSL phambi kwayo, okungase kwehlise nezinga lobugebengu entsheni ngoba le ndawo isinobugebengu kakhulu.
Ngaphandle kwalokho, okubaluleke kakhulu kuzosimama nomnotho wendawo, ikakhulukazi ngokuza kwemidlalo yamaqembu amakhulu anjengoKaizer Chiefs ne-Orlando Pirates, kusizakale nomama abadayisa ukudla nezithelo enkundleni bakwazi ukuxosha ikati eziko, njengoba namathuba omsebenzi entuleka nje."