KUBUKEKA sengathi ngowamanqamu umdlalo weNewcastle Ladies, neSunflower WFC wokusonga isizini ka-2023 yeSafa KwaZulu-Natal Sasol League, ozoba ngeSonto ngo-1 emini, Osizweni Stadium, eNewcastle.
Womabili amaqembu ahlukaniswe ngamagoli kuphela kepha abambene ngamaphuzu awu-38 emidlalweni ewu-15 esidlaliwe ku-Stream A, okusho ukuthi iqembu elizonqoba umdlalo lizobe selibhekana neLindelani Ladies, kumaPlay-Offs esifundazwe.
Ngaphandle nje kokuthi womabili amaqembu alwela ukuzibekisela indawo kumaPlay-Offs, lo mdlalo uthathwa njengowamagqubu ngoba ngomzuliswano wokuqala iNewcastle yaguqisa iSunflower ngo 2-1.
INewcastle neSunflower yiwona maqembu njengamanje asebanga isicoco kuStream A, ngoba iLindelani Ladies isicacisile ku-Stream B, seyilinde ozonqoba phakathi kweNewcastle neSunflowerr, yize izodlala kusasa ngo-1 emini kowokusonga isizini neShooting Stars, eTara Road Field.
AmaPlay-Off esifundazwe okuyiwona azohlunga iqembu elizomela iKwaZulu-Natal, kwekazwelonke, azodlalwa ngoLwesithathu enkundleni esazomenyezelwa maduze.
AmaPlay-Off kazwelonke azoba ngoSepthemba 25 eBloemfontein, eFree State, yilapho okuyobe sekudlana imilala amaqembu ayisishiyagalolunye angompetha bezifundazwe, ukuhlunga amaqembu amabili azokhushulelwa kwiHollywoodbets Super League.
ILindelani seyifinyelele amahlandla amabili esigabeni sokuhlungela iqembu eligcina lidle ubhedu kuzwelonke, yona isalokhu iphume njalo inqina likaMabuyaze.
Ngesifanayo nakwiSunflower yaseMpumalanga, eHammarsdale, isidlale amahlandla amabili kowePlay-Offs kazwelonke eSasol League ibuye ilambatha futhi akungangatshazwa ukuthi izolwela ukubuyela kule midlalo kazwelonke kule sizini.
Kanti ngakolunye uhlangothi iNewcastle Ladies, yasoSizweni, eNewcastle, igcine ngo-2015 ukudlala kumaPlay-Offs esifundazwe, isalwela ukuyodlala okokuqala kwekazwelonke.
Njengamanje iKZN imelwe ngamaqembu amabili kuphela kwiSuper League, okuyiDurban Ladies neRoyal AM, kanti lokhu kuphonsa inselelo eqenjini elizomela isifundazwe eBlomfontein, emdlalweni kazwelonke yokwandisa isibalo samaqembu akulesi sifundazwe kwiSuper League, okuyiyona ligi yebhola labesifazane enkulu njengamanje eNingizimu Afrika.
Imidlalo yeSafa KZN Sasol League:
Kusasa ngo-1pm:
Ku-Stream A:
Newcastle Ladies v Sunflower WFC (Osizweni Stadium); Dlala Ntombazane v Ayaphila Ladies (FNB Wadley Stadium); Umlazi Arsenal v PSG Amabhaca Ladies (Mangosuthu Field); DUT Coastal WFC v DUT Midlands WFC (DUT Steve Biko Campus)
Ku-Stream B:
Shooting Stars v Lindelani Ladies (Tara Road Field); Young Fighters Ladies v Westville United Ladies (Nkanini Sports Ground); White City Ladies v Darnall Ladies (Enrico Park Empangeni Sportsfield); Sapphire Ladies v Makhanisi Ladies FC (Cator Manor)