APHUME inqina likaMabuyaze womathathu amaqembu aKwaZulu-Natal agijima kwiHollywoodbets Super League, iLindelani Ladies, iDurban Ladies neRoyal AM, ehluleka ukucosha amaphuzu ngempelasonto.
ILindelani inqotshwe yiCopperbelts Ladies ngo 2-1 eSugar Ray Xulu Stadium ngoMgqibelo. Amagoli eCopperbelt ashaywe nguThandi Rameri noTshibogo Madihlaba, eleLindelani laqhamuka kuNobahle Mdelwa.
Lo mphumela uchaza ukuthi iLindelani isinqotshwe imidlalo engu-16 ilandelana. Selokhu yagcina ukucosha iphuzu ngesikhathi ibambana neCopperbelt ngo 1-1 ngoMashi.
Leli qembu eligijima okokuqala esigabeni esiphezulu lisesendaweni ka-15 ngamaphuzu amane emidlalweni engu-20. Lisele ngamaphuzu angu-10 eqenjini elisendaweni ka-14, iCity Lads, njengoba selisalelwe yimidlalo eyishumi ukuthi lizame ukuzihlenga ezembeni.
IDurban Ladies iqunjwe phansi yiJVW FC ngo 3-0 e-UJ Soweto Stadium. UNompumelelo Nyandeni uvalele amagoli amabili, elinye lashaywa nguGabriela Salgado.
Isisendaweni ka-13 kwi-log ngamaphuzu angu-16 emidlalweni engu-20.
IRoyal AM iwadedele wonke amaphuzu eHarry Gwala Stadium inqotshwa yi-University of Johannesburg ngo 1-0, ngegoli lika-Ayesha Moosa. IThwihli Thwahla isendaweni yesikhombisa ngamaphuzu angu-32 emidlalweni engu-20.
I-UJ isesendaweni yesibili ngamaphuzu angu-43 emidlalweni engu-20. Ithole ithuba lokunciphisa igebe phakathi kwayo namaqembu aphezulu, iMamelodi Sundowns ne-University of Western Cape, abebedlala emiqhudelwaneni yangaphandle ngempelasonto.
I-UWC ibidlala emqhudelwaneni wokuhlungela iCaf Champions League, kanti iSundowns ibimenywe emqhudelwaneni obubanjelwe e-USA, iWomen’s Cup.
Kulo mqhudelwano amaBrazilian anqotshwe osokhaya, iKansas City Current, ngo 3-0 aphinde ashaywa yiqembu laseJapan, i-INAC Kobe, ngo 2-0.
Umqeqeshi uJerry Tshabalala uthe le midlalo ibakhombisile ukuthi ungakanani umehluko phakathi kwezinga leSuper League namanye amaligi akawamanye amazwe.
“Ukudlala nalawa maqembu kusivule amehlo ngoba kusikhombisile ukuthi akufanele sinethezeke kuleli zinga esikulona, kwasicacisela nalapho kufanele sithuthuke khona.
“Kugqamise lapho siqine ngakhona nalapho okufanele silungise khona uma sifuna ukuqhubeka nokukhonya ekhaya nakwizwekazi lonkana,” kusho uTshabalala.
Imiphumela yemidlalo yeHollywoodbets Super League yangempelasonto:
Lindelani Ladies 1-2 Copperbelt Ladies, JVW FC 3-0 Durban Ladies, Richmond United 1-1 University of Pretoria, Royal AM 0-1 University of Johannesburg, University of Fort Hare 0-1 First Touch, Thunderbirds 1-4 TUT Mtsatsantsa.