UHLEKA yedwa umqeqeshi we-Orlando Pirates, uJose Riveiro, othole umphumela awufanise nesibusiso ngaphambi kokubhekana nezimbangi zabo ezinkulu iKaizer Chiefs, koweDStv Premiership ngoMgqibelo ngo 3.30 ntambama, e-FNB Stadium, eGoli.
Ngempelasonto edlule iPirates ayigcinanga ngokukhipha iMamelodi Sundowns kwiMTN8 ebiyivikela iyinika isibhaxu sika 3-0. AmaBhakabhaka abuye akhumbuza abathandi bebhola kuleli ukuthi, abashayi eceleni laba abayithipha njengeqembu elingancintisana neSundowns embangweni wesicoco seligi.
Kumasizini amahlanu adlule, iSundowns iyazenzela ngokudla isicoco kodwa indlela iPirates engene ngayo emakethe yabadlali, kube nalelo themba kwabathile lokuthi, mhlawumbe ingakwazi ukuphazamisa iSundowns obekubukeka sengathi ayishayeki kalula kumasizini edlule.
IBucs ‘izokwamukela’ Amakhosi ngoMgqibelo ihambela phezulu kulandela ingcwenga yebhola elidlale inenebula iSundowns emdlalweni obusePeter Mokaba Stadium.
URiveiro odabuka eSpain, utshele abezindaba esithangamini nabo ePolokwane, ngemuva komdlalo, ukuthi umsebenzi wakhe ngeke ube nzima kangako kuleli sonto ngenxa yomuzwa osekhempini kulandela ukunqoba kwiSundowns.
“Kufana nesibusiso ukuya emdlalweni ofana nalo esiya kuwona usuka kwiwini emqoka ngale ndlela ngoba isimo somqondo sabadlali siba lapho wena njengomqeqeshi, obungeke ukwazi ukufinyelela khona,” kusho uRiveiro.
“Akukhathalekile ukuthi silwela amaphuzu noma sizama ukuzifaka kowamanqamu womqhudelwano omqoka kodwa iqiniso ukuthi ukuthola umphumela oncomekayo kumqoka kubadlali ngokomqondo ikakhulukazi uma beya komunye (umdlalo) omqoka njengalo wangempelasonto esiya kuyona.
“Emasontweni ambalwa adlule sibuyele emakhaya kumuncu sisuka enkundleni efanayo sishaywe iSekhukhune ngakho-ke kuyangijabulisa ukuthi kulokhu uhambo lwethu luzobe lungcono yize lulude.
“Uyangithokozisa umuzwa ongaphakathi ekhempini ngaphambi komdlalo omqoka futhi onzima,” kusho uRiveiro.
Ngomdlalo wabo neSundowns lo mqeqeshi uthe: “Okwenze okuningi kwaba lula ukuthi naphakathi nesonto abadlali bebengakuqageli ukuthi sizowina.
“Angazi bebekuthathaphi lokhu kodwa sigcine sonke sesikukholwa njengabo nangempela kwenzeka ngendlela ebesikuphupha ngayo.
“Kuningi okusafanele sikulungise kodwa njengoba ngihlale ngisho, ngineme ngendlela abadlali abakhombisa ngayo intshisekelo yokufunda ngokushesha kulokhu esibatshela kona,” kusho uRiveiro.