APHINDE aba ngompetha womabili amaqembu abemele iNingizimu Afrika emqhudelwaneni weCosafa wokuhlungela iCaf African Schools Football Championship obubanjelwe eWalvis Bay, eNamibia ngempelasonto.
Iqembu labafana lika-Under-15 linqobe iZambia ngo 4-2 kowamanqamu sekukhahlelwa amaphenathi. Umdlalo ubuphele zibambene ngo 1-1.
Iqembu lakuleli liyinqobe yomithathu imidlalo yamaqoqo, liguqisa iZimbabwe ngo 1-0, i-Angola ngo 3-0 neSwatini ngo 4-0. Kowandulela owamanqamu lidlule kwiMalawi ngo 2-1.
Selizomela isifunda iCosafa emqhudelwaneni omkhulu ozobe uhlanganise amazwe azobe emele izifunda ezehlukene ezwenikazi i-Afrika.
Khonamanjalo, iqembu lamantombazane liqumbe phansi iMalawi ngo 3-1 kowamanqamu.
Liqale ukushosholoza kweyamaqoqo lapho libhudluze khona iZimbabwe ngo 7-0, i-Angola ngo 13-0 neSwatini ngo 4-0. Liphinde lanenebula iLesotho ngo 10-0 kowandulela owamanqamu.
Leli qembu selizovikela isicoco sokuba ngompetha base-Afrika ngonyaka ozayo, lapho lizobe lihambisana khona neMalawi, ezibekisele indawo ngokufika kowamanqamu.
Ebafaneni kuqokwe uTenani Simfukwe njengomdlali ovelele, kwathi u-Okester Kanyenda wabashaya emakhanda ngokushaya amagoli amane.
UWilliam Zulu uqokwe njengonozinti ovelele kwathi iqembu lakuleli lathola indondo ye-Fair Play ngenxa yokuziphatha kahle.
Emantombazaneni umgadli wakuleli uLeonay Kock uhambe phambili ngokuhlohla amagoli angu-11, waphinde waqokwa njengomdlali ovelele.
Uzakwabo uMia Heneke uthole indondo yokuba ngunozinti ovelele kwathi indondo yeFair Play yatholwa yiMalawi.
Umengameli weSouth African National Football Association (Safa), uDanny Jordaan, uwabongele womabili amaqembu ngokugcina irekhodi elihle lokuba ngompetha beCosafa iminyaka emithathu ilandelana.
“Kuyathokozisa ukuthi siphinde sathola imiphumela emihle emincintiswaneni yezikole. Izikole zisalokhu ziyisisekelo sawo wonke amaqembu ethu. Womabili amaqembu, abafana namantombazane, aphinde aba ngompetha beCosafa futhi asengenile kowezwekazi wezikole,” kusho uJordaan esitatimendeni seSafa.
Izinsuku okuzodlalwa ngazo umqhudelwano omkhulu weCaf Schools Championship ngonyaka ozayo nezwe elizowusingatha kusazomenyezelwa ngokuhamba kwesikhathi.