UMGADLI we-Orlando Pirates othembisayo uZakhele Lepasa, usezocinga inethi edlubhe umfaniswano weSuperSport United, emuva kokubolekiswa kwakhe yiBucs eqenjini eliphekwa nguGavin Hunt.
YiPirates eqinisekise emakhasini ayo ezinkundla zokuxhumana ngalokhu kubolekisana kwayo naMatsatsantsa A Pitori.
Konke kudalulwe izolo emini, kwavela nokuthi uzohlala ePitoli, izinyanga eziyisithupha bese ebuyela ekhaya ekupheleni kwesizini.
ULepasa (25), ungomunye wabadlali abebekhombisa izimpawu zokumuzwa uJose Riveiro, okufakazelwa wukuthi ayidlale cishe yonke eyesigamu sokuqala sesizini okuhlanganisa nowamanqamu weMTN8 benqoba isicoco.
Ngaphezulu kwalokhu, uLepasa uthathe ngisho iso likaHugo Broos, oqeqesha iBafana Bafana ngendlela abegqame ngayo kwiBucs esiwombeni sokuqala sesizini.
Zimjikele nokho izinto muva nje, njengoba ijezi bese limeqa ekhona kwabuyela uTerrence Dzvukamanja, enhliziyweni kaRiveiro.
Emidlalweni kaLepasa engu-41 ayidlalele iqembu, ushaye amagoli amahlanu kuphela (linye kule sizini emidlalweni engu-10).
Kusukela kufike uMamour Niang, waseSudan, uLepasa uzoba ngumgadli wesibili ukufika ePitoli, ngoba kuvuleke iwindi lokushintshana ngabadlali.
Ukusayinisa kweSuperSport laba bagadli kuvulele iStellenbosch FC uphawini wokuthi ithole uThamsanqa Gabuza, no-Iqraam Reyners.
ISwallows FC ebixinwe yisigwebo seFederation of International Football Association, esixazululwe ngoLwesihlanu oludlule, igcine ivunyelwe ukusayinisa.
Ifake emabhukwini ayo uDaniel Akpeyi, omunye wabadlali abakhonjwe indlela kwiKaizer Chiefs ngesikhathi kuqashwa u-Arthur Zwane njengenhloko yabaqeqeshi.
Lo nozinti waseNigeria, ofike kuleli ezodlalela iChippa United, uthe angachithwa yiChiefs waphenduka unuka ngilahle engalitholi iqembu.
Uhlale ekhaya ekhonjwa laphaya, nalaphaya kwaze kwaba ubizwa yiSwallows ukuyojima nayo kodwa yazi ukuthi ngeke ikwazi ukumsayinisa ngenxa yesigwebo sayo ebesisaqhubeka.
U-Akpeyi uke waziqeqesha yedwa kanjalo nakwiMaritzburg United ucishe wasayiniswa kodwa kwaba nezinkinga ngezibalo zabadlali abangewona umsinsi wokuzimilela eNingizimu Afrika, abebesemabhukwini eTeam of Choice.