UMQEQESHI woMkhambathi FC, uSiyabonga Mdluli, uthi kuyinselelo enhle ukuqeqesha esigabeni seSafa ABC Motsepe League, futhi uzimisele ngokulwela ukuthi iqembu likhushulelwe esigabeni seMotsepe Foundation Championship (First Division).
Yize uMdluli eke wathi xhinti ekuqeqesheni kwiPremier Soccer League (PSL), lapho ebecija iMaritzburg United edlala kwiDiski Challenge, waba yiphini lomqeqeshi esikimini esikhulu seqembu kodwa usazi njengentende yesandla sakhe isigaba seMotsepe League.
Phambilini usebenze noSimo Dladla kwiReal Kings (engasekho), ngenkathi idlala kulesi sigaba ngaphambi kokukhushulelwa kwiFirst Division eminyakeni embalwa edlule.
UMkhambathi oqede endaweni yesithupha kwi-log ngesizini edlule, uyiqale kahle isizini njengoba emidlalweni emine, unqobe emibili wadlala ngokulingana kowodwa, wahlulwa kowodwa. Lokho kuwenza ube sendaweni yesine njengamanje kwi-log yeSafa KwaZulu-Natal ABC Motsepe League.
UMkhambathi uzotholana phezulu neGWP Friends ngeSonto ngo-3 ntambama, emdlalweni obhekwe ngabomvu ePrincess Magogo Stadium, KwaMashu.
“Ngeke kube umdlalo olula lona esiyowudlala neFriends ngoba isayiqale kahle isizini futhi ayikehlulwa emidlalweni emithathu. Sizimisele ukuzibamba ziqine emdlalweni. Kungenzeka noma yini, singabuya nephuzu kwesinye isikhathi sikwazi nokuwantshontsha womathathu uma kwenzeka.
“Sizokugwema ngayo yonke indlela ukuzifaka ngaphansi kwengcindezi. Sifana nengane esacathula kodwa ekhombisa ukukhula kahle njengoba kuyisizini yethu yesibili lena kulesi sigaba,” kuchaza uMdluli.
Ephawula ngokuqeqesha kulesi sigaba seMotsepe League, uMdluli uthe: “Ukuqeqesha kulesi sigaba seMotsepe League, kuyinselelo enhle futhi kuqinisana ukhakhayi ngenxa yezinselelo ezikhona kusukela ezinkundleni zakhona ezinye zazo ezingekho esimeni esigculisayo.
“Yize kunjalo kodwa sinabadlali abanekhono eliyisimanga nabaqeqeshi abanolwazi lwebhola nabahleleke ngendlela emangalisayo. Kanjalo futhi namanye amaqembu akulesi sigaba ahleleke ngendlela ongeke wayilindela esigabeni salolu hlobo.”
IGWP Friends isayiqale ngesivuthevuthe le sizini njengoba isayinqobe yomithathu imidlalo kanti igabe ngabadlali abanamava okudlala esigabeni esikhokhelayo okubalwa uThanduyise “Gonondo” Khuboni, ongukaputeni weqembu ebelisambangweni wesicoco seligi ngesizini edlule.
Imidlalo yeSafa KZN ABC Motsepe League:
NgeSonto ngo-3 ntambama:
Kwi-Stream A:
Summerfield Dynamos v Mkhakhwini Classic (Chatsworth Stadium); Happy Wanderers v Milford FC (Jabavu Stadium)
Kwi-Stream B:
GWP Friends v Mkhambathi FC (Princess Magogo Stadium); XI Experience v Umvoti FC (Umkomaas Bisset Sports Ground); Drakensberg FC v Msinga United (Kandahar Stadium)