UKUGQOZA kwemiphumela encomekayo kwiCape Town Spurs kusukela kuqale isizini yeMotsepe Foundation Championship kufanele ukuba kuyamsinda umqeqeshi wayo, u-Ernst Middendorp.
Nakule mpelasonto lo mqeqeshi waseGermany ohlale ekhononda ngonondweba uphinde wabuka iqembu lakhe lihluleka ukuqoqa amaphuzu agcwele ngesikhathi licazelana ngawo neBaroka FC abadlale nayo kwaba u 1-1 ngoMgqibelo e-Athlone Stadium, eKapa.
Ngesizini edlule iSpurs idliwe izembe kade kuyisizini yayo yokuqala ibuyele esigabeni esikhulu. Kule sizini iwini iSpurs yayigcina ngoSepthemba.
Idlale yaze yaphela isizini edlule uMiddendorp ezama ukuhlanganisa isikwati kodwa waphikwa imiphumela ngale ndlela yokuthi akazange alithole ngisho ithuba lokuzama ukugwema izembe ngeyokuhlunga.
Kusukela ama-Urban Warriors egencwe izembe esigabeni esikhulu asaphumelele ukunqoba imidlalo emibili adlala ngokulingana kwemine kwase kukhala induku kweminye emihlanu. Lokhu kwenza ingabalwa emaqenjini asethubeni lokulwela ukukhuphukela esigabeni esikhulu. Ibambe indawo ka-14 kwi-log ngamaphuzu awu-10.
Kwenzeka konke lokhu, esicongweni se-log, iMilford FC isaqhwakele yize ithole isibhaxu sika 2-1 kwiHungry Lions FC ngawo uMgqibelo eSuzuki Stadium.
Leli qembu laseKZN seliqoqe amaphuzu angu-23 emidlalweni engu-11 lapho linqobe khona eyisikhombisa lashaywa kwemibili lase licazelana ngamaphuzu kweminye emibili.
NgeSonto i-Orbit College iyeke ithuba lokuvala igebe kwiMilford ngesikhathi ivumela ukubanjelwa ekhaya iDurban City.
Umphumela walo mdlalo obuseRusternburg ophele kungu 1-1 ushiye i-Orbit neCity besendaweni yesibili neyesithathu ngokwahlukana kwi-log.
IHighbury FC neLeruma FC bashayane baze babukana kuba u 0-0 ngesikhathi esifanayo iKruger United yanqoba ngo 2-0 kwi-University of Pretoria eMpumalanga.
Kweminye imiphumela yeMotsepe Foundation Championship ngempelasonto edlule kuhambe kanje: JDR Stars 2-0 Venda Football Academy; Black Leoaprds 1-1 Upington City; Casric Stars 1-2 Pretoria Callies