XOLILE MPISANE
ISIFUNDAZWE saKwaZulu-Natal sizomelwa AmaZulu FC neDurban Ladies FC emqhudelwaneni kazwelonke we-Engen Knockout Challenge ngemuva kokuthi la maqembu ebe ngompetha balesi sifundazwe ngempelasonto.
AmaZulu adle isicoco esigabeni sabesilisa, lapho bekududulana khona abafana abaneminyaka engaphansi kuka-19 ngokuguqisa ngo 1-0 iqembu ebelivikela le ndebe, iMidlands Academy FC, kowamanqamu eSiripati Road Sportsfield, eReservoir Hills, eThekwini, ngeSonto ntambama.
IDurban Ladies nayo ithele phansi ompetha bangonyaka odlule, iSunflower WFC ngo 1-0, ngegoli elingene sekusele amanenjana ngaphambi kokuthi umdlalo uphele.
Lo mqhudelwano oqale ngoLwesihlanu ekuseni ubuhlanganise amaqembu abafana angu-16 nawamantombazane angu-16, abehambisana ngamane emaqoqweni awo.
Ngemuva kwesigaba samaqoqo amaqembu amabili abeqhwakele adlulele kuma-quarter-final, akhiphana kwaze kwasala amabili azolwela isicoco.
Usuthu aluwuqalanga kahle lo mqhudelwano njengoba lushaywe yiBenfica United ngo 1-0 kowokuvula wamaqoqo. Nokho lukwazile ukunqoba imidlalo emibili elandelayo, luxebula iFrance ngo 3-0 neLangalibalele Sports Academy ngo 3-1.
Kuma-quarter-final lugudluze iLindelani United sekukhahlelwa amaphenathi ngemuva kokuthi umdlalo uphele zibambene ngo 0-0, lenza okufanayo kowandulela owamanqamu lapho likhiphe khona iMagic Future Stars.