ISIQALILE ukuhlukana imibono ngerekhodi lokushaywa kwamagoli elijahwa yinkentshane leMamelodi Sundowns, uPeter Shalulile, elishoda ngamane emidlalweni emihlanu ukufica eliphethwe nguCollins Mbesuma langu-25 kweyeligi.
Ngesizini ka-2004/2005 uMbesuma ushayele iKaizer Chiefs amagoli angu-25 kanti abangu-34 sekuhlanganiswe yonke imiqhudelwano.
UShalulile unyukele kwangu-21 ngoLwesibili eba ngumdlali wokuqala emlandweni wePremier Soccer League (PSL) ukushaya amagoli amathathu emdlalweni owodwa imidlalo ilandelana.
NgoLwesibili ushaye amathathu bemboza iLamontville Golden Arrows ngo 6-0 koweligi kanti emdlalweni ongemuva kwalowo ubeshaye isibalo esifanayo behlula iSwallows FC ngo 4-1.
Okugqamayo nokuhlukanisa imibono yabalandeli ngukuthi emagolini angu-21 kaShalulile alikho nelilodwa elivele ngephenathi.
Iyavela eyokuthi kwangu-25 kaMbesuma kwakukhona namaphenathi. NoShalulile kulindelekile emidlalweni ezayo ukuthi ozakwabo bawanike yena amaphenathi ukumlekelela emjahweni werekhodi.
Okumqoka nokho wukuthi ifomu kaShalulile neyeSundowns imbeka ethubeni elihle lokufica leli rekhodi, iPSL eke yabeka umklomelo wetomo kumgadli oyolifica.
Ngokufinyelela emagolini angu-20 uShalulile ujoyina uhla lwezinsephe zabagadli okubalwa kuzo uSiyabonga Nomvethe, Danniel Mudau, Wilfried Mugey naye uMbesuma.
Lokhu kugcine ngoNomvethe othathe isicathulo segolide neminye imiklomelo ngamagoli angu-20 awashayele iMoroka Swallows eyisiza iqeda endaweni yesibili kwilg yePremiership ngemuva kwe-Orlando Pirates ngo-2011/2012.
UMbesuma uwashaye ngo-2004/2005.
Ngaphambi kukaMbesuma, nguMudau owayebhale kabusha umlando naye kwiSundowns, ayishayela amagoli angu-24 ngesizini ka-1998/1999.
UMugeyi waba ngumgali wokuqala ngaphansi kwePSL eyabunjwa ngo-1996 ukushaya amagoli angu-20 nangaphezulu.
Wabasela angu-22 kanti waphinde waba ngumgadli wokuqala odabuka ngaphandle kwaseNingizimu Afrika ukwenza lokhu.
UShalulile ungowesibili kwazise yize bekhona abagadli bangaphandle njengoKnowledge Musona noMwape Musinda, abathathe isicathulo segolide kwiPSL kodwa abakaze bafike emagolini angu-20.
Ngaphezu kwemidlalo emihlanu yeligi, uShalulile usadlala kumaquarter final eNedbank kanjalo naweCaf Champions League nokumandisela amathuba okwengeza emagolini angu-27 asewashayile uma kuhlanganiswa yonke imiqhudelwano.
Ubhekiwe uShalulile emlenzeni wokuqala wesemi final yeChampions League nePetro de Luanda e-Angola namuhla ngo-6 ntambama.