Maritzburg United (2) 3
Royal AM (0) 1
KUKHUPHUKE ithemba ngamathuba okuvika izembe kwiMaritzburg United ewaqoqe egcwele amaphuzu ngesikhathi inqoba kubakhaya bayo iRoyal AM emdlalweni weDStv Premiership ngeSonto ebusuku, eHarry Gwala Stadium, eMgungundlovu.
Amagoli anike iMaritzburg ithemba nethuba lokuphefumula kangcono ashaywe u-Amadu Soukouna, esiwombeni sokuqala noFriday Samu kwesesibili. Elokubika ekhaya leRoya AM, lishaywe uMfundo Thikazi.
Womabili la maqembu afike enkundleni ehambela phezulu kwazise iRoyal AM ibisuka kwiwini kuMaZulu FC kanti iTeam of Choice inqobe ekuhambeni kwiMarumo Gallants.
Iqembu lasekhaya ilona elikhombise umfutho zisuka kwazise nabadlali basazama ukuzibekela indawo enhliziyweni kaFadlu Davids, osanda kubuyela kulona njengenhloko yabaqeqeshi.
Ngaphandle kweminyakazo ebibashiya bejabule abalandeli balama qembu abebephume ngobuningi babo eMphithi, umdlalo ubungenayo iminyakazo kwaze kwaba uSoukouna ubeka ezakhe phambibli ngomzuzu ka-34 kulandela uswidi wephasi obuvela kuKarim Kimvuidi.
Ukungena kwaleli goli kube sengathi kuyinika izimpiko iTeam of Choice ebisihlasela kulandelela eduze kwazise nabalandeli bayo bese bekutholile abebekuzele enkundleni.
Nakuba bekungekho okukhombisa ukuthi iMaritzburg isengozini, ayizange iwasebenzise ngendlela amathuba ebiwathola ngoKimvuidi noRowan Human, kwaze kwaba umzuzu wokugcina wesiwombe sokuqala lapho uSoukouna eshaye khona igoli lesibili.
Ithuba lokuqala lesiwombe sesibili liwele kuKimvuidi waphinde waganga ngebhola kufanele ashaye igoli ebelizokhulula iMaritzburg.
Ngokubona ukuthi izinto azihambi kahle u-Abram Nteo, opheka iRoyal AM ukhiphe uTebogo Potsane noMotebang Sera, ezindaweni zabo wafaka, uThikazi noMxolisi Macuphu.
Ngesikhathi esifanayo iqhawe lamagoli amabili, uSoukouna lithintekile lakhishwa endaweni yalo kwangena uSamu.
Uphinde waqinisa phambili uNteo ngokufaka uMenzi Masuku noRuzaigh Gamildien, okwenze iRoyal AM yakhombisa izimpawu zobungozi ezintini zikaHugo Nyame.
Izinguquko ebese zenziwa abaqeqeshi zinhlangothi zombili zithe ukuwudambisa umfutho womdlalo usuyela ngasemaphethelweni.
USamu ugcine eyitholele iMaritzburg igoli lokuyikhulula ngomzuzu wokuqala kwengu-10 ebeyengezwe unondweba, uThikazi washaya elokubika ngowokugcina.