UHLABEKE umxhwele ngendlela ezakhe ezisayibambe ngayo selokhu kubuywe ekhefini le-Africa Cup of Nations (Afcon) umqeqeshi weMaritzburg United, uSimo Dladla.
Ukholwa wukuthi lokho kuzoba nezithelo emidlalweni yeMotsepe Foundation Championship abasozoyidlala.
IMaritzburg izibekisele indawo emzuliswaneni weNedbank Cup Last 16 ibhaxabula ngo 3-0 iqembu lama-amesha elidlala kwiHollywoodbets Regional League, iPaarl United, koweLast 32 ePrincess Magogo Stadium, ngeSonto.
Leli qembu laseMphithi eliqhathwe neMamelodi Sundowns koweLast 16 weNedbank, libuyela kweyeMotsepe Championship ngokubhekana neNB La Masia ngoLwesihlanu ngo-7.30 ebusuku, eKing Zwelithini Stadium, eClermont.
“Ngisahlabeke umxhwele ngendlela esisadlale ngayo emidlalweni yakamuva kulandela ikhefu le-Afcon, okubalwa nawo lo weNedbank esiwudlale nePaarl (United) eyiqembu lama-amesha. Esikudingayo emidlalweni elandelayo ukuqhubeka nalo mgqigqo esikuwona kuze kube siyayithola le wini esiyifuna kakhulu njengamanje emidlalweni yeligi.
“Imidlalo yomkhumulajezi iyasiza ekunikeni abadlali ithuba lokudlala imidlalo ethe xaxa, okuyinto esiyidingayo njengoba siphuma ekhefini le-Afcon,” kusho uDladla.
Ngemuva kwekhefu le-Afcon, iMaritzburg idlale ngokulingana ngo 3-3 neCasric Stars yabe isibambana ngo 0-0 neMilford FC kweyeMotsepe Championship.
UDladla othathe izintambo zokuqeqesha kwiTeam of Choice ekupheleni kukaNovemba ngemuva kokukhonjwa indlela kukaZipho Dlangalala, usabhekene nenselelo yokunqoba umdlalo wakhe wokuqala weligi njengoba kweyisithupha yeligi lisashaywe kwemithathu ladlala ngokulingana kwemithathu.
Lokhu kuphonsela inselelo lo mqeqeshi ohlalelwe wumsebenzi wokubuyisela leli qembu kwiDStv Premiership, okuyinto efunwa ngusihlalo walo, uFarouk Kadodia.
“ILa Masia esiyodlala nayo isendaweni efanayo nathi kwi-log, ngakho iwadinga ngokufanayo amaphuzu kulo mdlalo esiyowudlala, nokwenza silindele umdlalo onzima kuyona kodwa futhi esingakwazi ukuwunqoba.”
ILa Masia eqeqeshwa wuDaine Klate ebuya esibhaxwini sika 6-1 esithole kwiSundowns kwiNedbank Cup ngeledlule, isendaweni ka-10 kwi-log yeChampionship ngaphezudlwana kweMaritzburg esendaweni ka-11.
Imidlalo yeMotsepe Foundation Championship:
NgoLwesihlanu - Ngo-3.30pm: Milford FC v Hungry Lions (Princess Magogo Stadium)
Ngo-7.30pm: Maritzburg United v NB La Masia (Sugar Ray Xulu Stadium)
NgoMgqibelo - Ngo-3.30pm: JDR Stars v Upington City (Soshanguve Giant Stadium); Casric Stars v Black Leopards (Solomon Mahlangu Stadium); Pretoria Callies v Marumo Gallants (TUT Stadium); Venda FC v Orbit College (Thohoyandou Stadium)
NgeSonto - Ngo-3.30pm: Platinum City Rovers v University of Pretoria (Isak Steyl Stadium); Magesi FC v Baroka FC (Old Peter Mokaba Stadium)