Mamelodi Sundowns (0) 0
Stellenbosch FC (0) 1
ISTELLENBOSCH FC izibeke ethubeni elingcono lokwedlulela kowamanqamu eMTN8 ishayela ekhaya iMamelodi Sundowns emdlalweni womlenze wokuqala weyandulela owamanqu, eLucas Moripe Stadium, e-Atteridgeville, ngoLwesithathu ebusuku.
Igoli enqobe ngalo iStellenbosch kube yiphenathi evalelwe phakathi nguFawaaz Basadien ngesiwombe sesibili.
Umphumela walo mdlalo ubeka iStellies ethubeni lokwedlulela kowamanqamu njengoba izophinda itholane phezulu namaSandawana kowomlenze wesibili eMoses Mabhida Stadium, eThekwini, ngeSonto ngo-3 ntambama.
ISundowns beyiphezudlwana ngomdlalo kuneStellenbosch ngesiwombe sokuqala ePitoli, okuqaphelekile ukwehluleka kwayo ukuba mandla ekufikeni emapalini.
Kuyithathe imizuzu engu-37 iSundowns ngaphambi kokufika emapalini, okuyilapho khona unozinti weStellenbosch, uSage Stephens, ale ukhasha ephebeza ibhola elibi ebelidudulwe wuPeter Shalulile.
Ngakolunye uhlangothi izivakashi bezimandla ngokugqisha emuva bese zizumisa ngokuhlasela uma zithola ithuba lokuya phambili, nokuzisebenzele njengoba zigcine ziya ekhefini zibambene ngo 0-0.
Ngesiwombe sesibili iStellenbosch ibuye ngolunye unyawo, ibingisahlali emuva seyimandla ngokuya phambili.
Nebala ukushoshela kwayo phambili kube nezithelo ithola iphenathi ngomzuzu ka-58, uDevin Titus obeyiphela endlebeni ezitobheni zeSundowns ekeqwa nguGrant Kekana ebhokisini, unompempe uThokozani Mkhize wayikhomba emlotheni.
Iphenathi ithathwe nguBasadien wayibhajiswa ezintanjeni ngomzuzu ka-62 kwaba ngu 1-0.
Izinguquko zangesiwombe sesibili ezenziwe ngamaSandawana kungena uThemba Zwane endaweni ka-Aubrey Modiba, u-Arthur Sales endaweni kaTashreeq Matthews noKutlwano Letlwaku endaweni kaShalulile, ziliphaphamisa leli qembu lasePitoli ebeselihlasela ngamandla.
Ngomzuzu ka-79 uStephens ogcine eqokwa njengomdlali ovelele uvimbe ibhola elibi egeza uMarcelo Allende obesephume qekelele ezama ukutholela ezakhe elokulinganisa.
Akugcinanga lapho, uTeboho Mokoena naye ucishe watholela i’Downs elokulinganisa ngomzuzu wokugcina ka-90 ededela inguzunga yeshodi ngaphandle kwebhokisi lashaya ipali selimdlile uStephens.