ISIPHINDE yajamelana phakathi kwezinhlangano ezengamele ibhola eNingizimu Afrika, iSouth African Football Association (Safa) nePremier Soccer League (PSL).
Lokhu kuvele ngoLwesine ntambama iPSL, eholwa ngu-Irin Khoza, ikhiha isitatimende esikubeke kwacaca ukuthi ayizukulubeka kwinkongolo yeSafa engeSonto eGoli.
Izinhlelo zeSafa, eholwa nguDanny Jordaan, kuleli sonto ziqale nge-Indaba ibhunga nezifunda zayo kuzwelonke.
“Isigungu esiphezulu (sePSL) sibhungile ngohlelo oluthunyelwe yiSafa nge-Indaba namalungu ayo oluqale ngomhlaka 21 no-22 ku-Ephreli 2023 noluzolandelwa yi-Ordinary Safa Congress ngeSonto ngo-Ephreli 23, 2023.
“Isigungu esiphezulu sivumelane ngo elethu ukuthi iPSL ayizukuya kwi-Indaba nakwinkongolo yeSafa.
“Isigungu esiphezulu ukunalokho sizocela izingxoxo noNgqongqoshe weZemidlalo, Ezobuciko namaSiko ngokunjalo noMengameli weCaf nezinye izinhlaka ezixhase ibhola elikhokhelayo emhlanganweni ongukhukhulela ngoqo wePSL Board of Governors,” kusho isitatimende sePSL.