I-SOUTH African Football Association (Safa) iphoqeleke ukumisa eminye imidlalo yeKZN ABC Motsepe League ngenxa yezinsolo zenkohlakalo.
UKwenzokwakhe Ngwenya ongumengameli wale nhlangano KwaZulu-Natal (KZN), utshele Isolezwe ukuthi bathole ukuthi kunamaqembu aseqale ukudayisa imidlalo. Uthe lokhu kudalwa isibalo esingalingani semidlalo esigijinywe amaqembu adlala kulesi sigaba esiphakela iMotsepe Foundation Championship.
Uthe lezi zinsolo sezibaphoqe ukuthi eminye yemidlalo bayimise bese badlalise eyamaqembu asilele emuva ngemidlalo.
"Njengoba imidlalo yamaqembu ingalingani kuwona wombili ama-stream sithole ukuthi kukhona amaqembu asedayiselana imidlalo. Kafishane nje, lawo anethuba lokudla isicoco seligi athenga lawo osekucacile ukuthi ngeke asasinqoba futhi ngeke asadliwa izembe ukuthi uma bedlala nawo anqobe. Kanjalo nalawo aselilahlile ithemba ngesicoco adayisela amanye. Kuningi nje ukukhohlakala esikutholayo.
“Ukugwema lo mkhuba, sesithathe isinqumo sokuthi siyimise imidlalo yamaqembu anesibalo esiphezulu semidlalo. Kusukela kwimpelasonto esiya kuyo, kuzodlala anesibalo esincane semidlalo. Lokhu sizokwenza kuze kuba siyalingana isibalo. Kumele senze isiqiniseko sokuthi siyasivikela isithunzi seligi yethu. Wonke umuntu akanqobe ngoba kufanele," kubeka uNgwenya.
Ama-stream womabili anamaqembu ayishumi. Amaqembu anemidlalo eminingi asegijime ewu-14, kuthiwa lawo anesibalo esincane abe nemidlalo ewu-11.
UNgwenya uphinde waveza ukuthi icala leNjampela neStone Breakers lizohlala namuhla (uLwesine) emahhovisi eSafa, eThekwini.
Ezinsukwini ezedlule, leli phephandaba libike ngevidiyo ebezungeza, iveza abathile bejaha unondweba ngemuva komdlalo wala maqembu. Kuzwakala kuyo omunye ememeza, ethi akashaywe unondweba ukuze ezoyeka ukurobha ngokuzayo. Leli cala bekumele lihlale ngoLwesihlanu olwedlule.
UNgwenya ulibeke ngembaba elokuthi lizojeza kanzima elizotholakala linecala. Lesi sehlakalo senzeke emuva kwenye incwadi ebizungeza, kusolwa esinye isikhulu samaqembu adlala kwiKZN ABC Motsepe League ngokugwazela onondweba.
UNgwenya uthe lezi zinsolo basaziphenya. Njengoba sezidumela emasumpeni, umbango udla phansi kule ligi.
Esicongweni kwi-stream A, iMilford enemidlalo ewu-13, ibambene ngamaphuzu awu-30 neSummerfield Dynamos noMkhumbane Classic abanemidlalo ewu-14. IStone Breakers sikweyesine ngawu-26. Emsileni kunoMkhwakhwini ngayisikhombisa emidlalweni ewu-14. Kwi-stream B, kuqhwakele Umsinga ngawu-28 esibalweni semidlalo efanayo. IX Experience isekugcineni ngephuzu elilodwa.