IPHINDE yazifaka obishini iRoyal Am idedela iStellenbosch FC iyijikele esiswini njengotshwala emdlalwenin weDStv Premiership eHarry Gwala Stadium, eMgungundlovu ngoLwesihlanu kusihlwa.
Iqembu laseMgungundlovu yilo eliboniswe inethi kuqala ngonyawo lukaSiphiwe Cele ngesiwombe sokuqala nokuywe ekhefini kusabhaliswe lona lodwa ebhodini.
Zibuye ekhefini amatafula ajika iStellies iphakama ngegoli likaDeano Van Rooyen.
Aqale ukushabalala amathuba okubuya kwe-Am iqembu laseKapa selibeka igoli lesibili livela kuJayden Adams nelesithathu lika-Iqraam Rayners.
La magoli amathathu ayimboze kakhulu i-Am kwazise abesho ukungenelwa ngamagoli ayisikhombisa emidlalweni emibili yeligi ilandelana.
Leso sikweletu yiso esenze abantu banikela kwiTwitter bashiya abangalazi belimisa ngembaba elokuthi izembe lizodlula nayo kule sizini.
Nebala, kule sizini iqoke ukuyosebenzisa iHarry Gwala Stadium, okuyinkundla okuyikhaya leMaritzburg, egojelwe yizembe ngesizini edlule.